काठमाडौँ । काठमाडौं महानगरपालिकाका मेयर बालेन शाहले बालकुमारी घटनालाई लिएर देशले सज्जनलाई लाचार बनाउने टिप्पणी गरेका छन् ।
शुक्रबार राती सामाजिक सञ्जालमा एक कविता लेख्दै मेयर बालेनले यो देशले सज्जनलाई लाचार बनाउने टिप्पणी गरेका हुन् । यस्तै, लाचारलाई मर्न बाध्य बनाइने उनले कवितामार्फत जनाएका छन् ।
यस्तो छ बालेनको कविता
यो देशले सज्जनलाई लाचार बनाउँछ,
लाचारलाई मर्न बाध्य बनाउँछ ,
मर्न नसकेकोलाई अपराधी बनाउँछ,
अपराध पछि आफू उठ्ने माध्यम बनाउँछ।
यो देशले मुर्दाघर बनाउँछ,
बाच्ने ठाउँ दिँदैन ,
परिस्थितिले लासको दर बनाउँछ,
मान्छेलाई भाउ दिँदैन।
शुक्रबार ईपिएस भाषा परीक्षा दिन माग गर्दै बालकुमारीमा युवाहरू प्रदर्शनमा उत्रिका थिए । प्रदर्शनका क्रममा दुई युवाको ज्यान समेत गएको थियो ।
