काठमाडौंः नेपालका उद्यमी व्यवसायीहरु पछिल्लो समय एकाएक सत्तारुढ नेपाल कम्युनिष्ट पार्टी (एमाले) मा प्रवेश गर्ने लहर बढेको छ ।
यही मेसोमा उद्योगपति राजेश कुमार अग्रवाल पनि नेपाल कम्युनिष्ट पार्टी (एमाले)मा प्रवेश गर्नु भएको छ ।
प्रधानमन्त्री निवास बालुवाटारमा मंगलबार आयेजित एक कार्यक्रमका बीच प्रधानमन्त्री एवं पार्टी अध्यक्ष केपी शर्मा ओलीले अग्रवाललाई खादा लगाई पार्टीमा स्वागत गर्नुभएको थियो । प्रधानमन्त्रीले स्वागत पश्चात पार्टीमा अग्रवालबाट राम्रो भुमिका निर्वाह हुने विश्वाससमेत व्यक्त गर्नु भएको प्रधानमन्त्रीको निजी सचिवालयले जनाएको छ ।
भैरहवा निवासी ४९ वर्षिय अग्रवाल अर्घाखाँची सिमेन्ट र श्री स्टिल प्रालिको महाप्रबन्धक समेत हुनुहुन्छ । लामो समयदेखि उद्योग व्यवसायीको हितमा कार्यरत उहाँ हाल नेपाल उद्योग वाणिज्य महासंघको केन्द्रीय सदस्य पनि हुनुहुन्छ ।
पार्टी प्रवेश कार्यक्रममा आफू यसअघि कुनै राजनीतिक दलसँग आवद्ध नभएको जनाउँदै उहाँले प्रधानमन्त्री एवं एमाले अध्यक्ष केपी शर्मा ओलीले विकास र समृद्धिका लागि मुलुकलाई नेतृत्व दिइरहनुभएकाले पार्टी प्रवेश गरेको बताउनु भएको थियो ।
“प्रधानमन्त्रीको कदममा हामी उद्योग व्यवसायीले पनि साथ दिनुपर्छ भन्ने लागेर पार्टीमा प्रवेश गरेको हुँ,” उहाँले भन्नुभयो ।
