काठमाडाैंः जनता समाजवादी पार्टी, नेपालका बरिष्ठ नेता राजेन्द्र महतोले आफ्नो पार्टीका नेता, कार्यकर्ताको रिहाइका लागि गृहकार्य सकारात्मक रुपमा अगाडी बढेको बताउनुभएको छ ।
मंगलबार प्रतिनिधि सभाको बैठक पछि सञ्चारकर्मीहरुलाई प्रतिक्रिया दिँदै वरिष्ठ नेता महतोले प्रधानमन्त्री केपी शर्मा ओलीसँगको भेटमा मुद्दा मामिलाको सन्दर्भमा गृहकार्य सकारात्मक रुपमा अगाडि बढेको बताउनुभएको हो ।
पहिले मुद्दा मामिलाको काम अगाडी बढेमा सत्ता समीकरण लगायतको विषयमा कुरा गर्ने उहाँले बताउनुभयो । नेता, कार्यकर्ताको मुद्दा फिर्ता गर्न पार्टी भित्र एकमत भएको भन्दै उहाँले नेताहरुले प्रधानमन्त्री ओलीसँग भेटवार्ता गरेपनि निर्णय भने पार्टीले गर्ने बताउनुभयो ।
उहाँले भन्नुभयो ‘मुद्दा मामिलाको सन्दर्भमा गृहकार्य सकारात्मक रुपमा अगाडी बढेको छ । काम होस् भन्ने हामीले चाहेको । पहिले मुद्दा मामिलाको अगाडी बढोस् न । अनि बाँकी कुरापनि गरौँला नी त ।’
जसपाका नेता लक्ष्मणलाल कर्णले प्रधानमन्त्री ओलीसँगको भेटमा आफ्ना मागहरुको विषयमा कुरा भएको बताउनुभयो । माग पुरा गर्ने आश्वासन आएको भएपनि देखिने गरी काम नभएको बताउनुभयो ।
छलफलको क्रममा जसपाको सहयोग चाहिए काम गरेर देखाउनुपर्ने अनि मात्रै जसपाले निर्णय गर्ने बताएको नेता कर्णले बताउनुभयो ।
उहाँले भन्नुभयो ‘हामी गएका थियौँ । हामीले त्यहाँ ४ वटा विषयहरु उठाइरहेका छौँ । जुन हाम्रो माग हो । त्यो मागलाई आश्वासन अस्तिदेखि पाइराख्या छौं । भन्या पनि हो पोजेटिभ कुरा चलिराखेको छ । तर देखिने गरी काम आएकै छैन । काम हुनुप¥यो । उहाँहरु सहयोग मागिराख्नुभएको छ भने आज पनि हाम्रो छलफलमा, काममा हेर्नुप¥यो । काम गरेर देखाउनुप¥यो । त्यसपछि मात्रै हामी निर्णय गछौँ भन्नेकुरा ग¥यौँ । उहाँले देखाउँछु भन्नुभएको छ हेर्दै जाउँ ।’
नेकपा(एमाले) संसदीय दलका उपनेता सुवासचन्द्र नेम्वाङले जसपा र एमालेबीचको सम्बन्धमा कुनै शर्त नभएको बताउनुभयो । रेशम चौधरीको रिहाइ, मधेस आन्दोनसँग सम्बन्धित विषयमा कुरा भएपनि सत्ता साझेदारीको विषयमा कुरा नउठेको बताउनुभयो ।
उहाँले भन्नुभयो ‘कुनैपनि शर्तबन्दी छैन हाम्रो सम्बन्धमा । उहाँहरुले कुनैपनि शर्तबन्दी राख्नुभएको छैन । हामीबीचमा कुनैपनि शर्तबन्दी छैन । रेशम चौधरी, मधेस आन्दोलन लगायतका विषयमा उहाँहरुले भन्नुभएको छ । सत्ता साझेदारी गर्नेकुरा त्यहाँ उठिरहेको छैन ।’
अहिलेसम्म जसपाको मागसँग सम्बन्धित भएर मात्रै कुरा भइरहेको उपनेता नेम्बाङ्ले बताउनुभयो । दुईपार्टीबीच राम्रो सम्बन्ध भयो भने सत्ता समिकरण हुनसक्ने पनि उहाँले बताउनुभयो ।
