एजेन्सी । छिमेकी राष्ट्र भारतमा फेरि एकपटक कोभिड–१९ का केसहरू बढ्न थालेका छन् । कोरोनाको जेएन-वान नयाँ भेरियन्ट केरलामा फेला परेको छ ।
जसका कारण आइतबार चार जनाको मृत्यु भएको थियो । यूपीमा पनि एक कोभिड पोजिटिभ व्यक्तिको ज्यान गएको छ । यद्यपि, ती रोगी जेएन-वान भेरियन्टबाट संक्रमित थिए या थिएनन् भन्ने पुष्टि भएको छैन ।
भारतको केन्द्रीय स्वास्थ्य मन्त्रालयका अनुसार, भारतमा आइतबार ३३५ नयाँ कोभिड-१९ मा सङ्क्रमण भएको र सक्रिय सङ्क्रमितको सङ्ख्या बढेर १,७०१ पुगेको बताएको छ ।
कर्नाटक सरकारले सब भेरियन्ट जेएन-वान बारे अलर्ट जारी गरेको छ । केरलामा स्वास्थ्यमन्त्री वीणा जर्जले भनिन्– चिन्ता लिनु पर्दैन । हामीले निरन्तर अनुगमन गरिरहेका छौँ ।
आईसीएमआरका महानिर्देशक डा राजीव बहलका अनुसार केरलाको तिरुवनन्तपुरममा डिसेम्बर ८ मा यो केस आएको थियो । जब ७९ वर्षीया महिलाको रिपोर्ट पोजेटिभ आएको थियो । महिलामा इन्फ्लुएन्जा जस्तो रोगको हल्का लक्षणहरू थिए । तर पछि उनी कोभिड-१९ बाट निको भइन् ।
भारतमा कूल कोरोना संक्रमितको संख्या ४ करोड ५० लाख नाघेको छ । योसँगै भाइरसबाट निको हुनेको संख्या बढेर ४.४४ करोड (४,४४,६९,७९९) पुगेको छ । स्वास्थ्य मन्त्रालयका अनुसार भारतमा निको हुने दर ९८.८१ प्रतिशत रहेको छ । कोभिड–१९ का कारण भारतमा अहिलेसम्म ५ लाख ३३ हजार ३१६ जनाको मृत्यु भएको छ ।
