हेटौँडा । वागमती प्रदेशका मुख्यमन्त्री डोरमणि पौडेलले संसदीय दलको बैठक डाकेका छन् ।
मुख्यमन्त्री पौडेलले आगामी बुधबारको लागि दलको बैठक बोलाएका हुन् । प्रदेश सभामा एमाले संसदीय दलका नेतासमेत रहेका पौडेलले बुधबार बस्ने बैठकमा आफ्नै दलका सांसदहरूले प्रदेशसभामा दर्ता गरेको अविश्वासको प्रस्ताव फिर्ता लिन निर्देशन दिने बताइएको छ ।
यता एमालेकै सांसद अष्टलक्ष्मी शाक्यलगायतले अविश्वासको प्रस्ताव पेश गरेपछि उनले प्रस्ताव फिर्ता लिन निर्देशन दिने तयारी गरेका हुन् । अविश्वासको प्रस्ताव प्रदेश सभामा विचाराधीन रहेको छ । एमाले र माओवादी केन्द्र मिलेर बनेको नेकपा हुँदा एमालेकै माधव नेपाल समूह र माओवादी केन्द्रका सांसदहरुले पौडेलविरुद्ध अविश्वासको प्रस्ताव दर्ता गरेका थिए ।
यस्तै बुधबारको संसदीय दलको बैठकमा एमालेकै वरिष्ठ नेता नेपाल पक्षका सांसद सहभागी हुन्छन् या हुँदैनन भन्ने बारे अझै टुंगो लाग्न सकेको छैन ।
प्रदेश सभामा ११० सदस्यमध्ये एमालेको एकल बहुमत छ । जसमा नेकपा एमालेका ५७ नेकपा माओवादी केन्द्रका २३, नेपाली कांग्रेसका २२, विवेकशील साझाका ३, नेपाल मजदुर किसान पार्टीका २, राष्ट्रिय प्रजातन्त्र पार्टी २, नयाँ शक्ति पार्टी १ जना सांसद रहेका छन् ।
