काठमाडौं । पोखरा थन्डर्सले सोमवार डिफेन्डिङ च्याम्पियन काठमाडौं रेजर्ससँग अग्रता जोगाउन नसक्दा २–१ को हार व्यहोर्दै जारी नेपाल सुपर लिग(एनएसएल) को शीर्ष स्थानमा उक्लिने अवसर गुमाएको छ ।
दशरथ रंगशालामा अन्तिम १० मिनेटमा काठमाडौंले दुई गोल फर्काउँदै पोखरा थन्डर्सको शीर्ष स्थानमा पुग्ने लक्ष्यलाई पूरा हुन दिएन । यो जितसँगै काठमाडौं पाँच खेलबाट आठ अंक बटुल्दै चौथो स्थानमा उक्लिएको छ । काठमाडौंले दुई जित र दुई बराबरीका साथै एक हार सामना गरेको छ । यता, जिततर्पm उन्मुख पोखराले अन्तिम समयमा दुई गोल व्यहोरेपछि शीर्ष स्थानमा पुग्ने अवसर गुमायो । पोखराले पाँच खेलबाट समान दुई जित र बराबरीका साथै एक हार सामना गरेको छ । पोखराको समान आठ अंक भए पनि गोलअन्तरमा काठमाडौंसँग पछि पर्दै चौथो स्थानमा खुम्चियो ।
खेलको पहिलो गोल अवसर १४औं मिनेटमा सिर्जना भयो । पोखराका मोसेस ग्याबा तुमको सट काठमाडौंका कप्तान तथा डिफेन्डर अन्जनको राईको खुट्टा डिफ्लेक्ट भएर दोस्रो बार नजिकैबाट बाहिरिन पुग्यो । चार मिनेटपछि नै मोसेसको लामो प्रहार सफल हुन सकेन । काठमाडौंले पहिलो अवसर सिर्जना गर्न २९औं मिनेटसम्म कुर्नु पर्यो । सोखरुखले करिब २५ यार्डबाट गरेको फ्रिकिक पोखराका गोलकिपर एभेस प्रिसोले उत्कृष्ग बचाउ गरे । पोखराका मोसेसले ३४औं मिनेटमा गोलकिपर एन्जल श्रेष्ठलाई पार गराएको बल काठमाडौंका डिफेन्डर आन्द्रेस नियाले क्लियर गरिदिए ।
लगत्तै कर्नर प्रहारमा मोसेसले हेड गोल गरे पनि राजीव लोप्चनले गोल लाइनबाट क्लियर गरे । ३७औं मिनेटमा मोसेसको अर्को हेडर पनि माथिल्लो बारमा लागेर बाहिरिँदा पोखरा पुन: अभागी सावित भयो । काठमाडौंले ४५औं मिनेटमा सहज अवसर खेर फाले । केङ्ग्यु ओलिभर १० यार्डबाट फ्रिहेडर गोल गर्न असफल रहे । त्यससँगै पहिलो हाफको खेल गोलरहित बराबरीमा रह्यो ।
पोखराले खेलको ५८औं मिनेटमा आयुष घलानको गोलबाट अग्रता लियो । स्टफेन पापाको ‘लङ रेन्ज सट’ काठमाडौंका गोलकिपर एन्जल श्रेष्ठले राम्रो नियन्त्रणमा लिन नसक्दा आयुषले नजिकैबाट गोल गरेका हुन् । काठमाठौंका लागि एनकेङ्ग्यु जुनियरको हेडर दोस्रो बार ठोकिँए बाहिरिन पुग्यो । ७२ औं मिनेटमा पोखराका मोसेसले गोल गर्ने सहज अवसर खेर फाले । काउन्टर अट्याकमा आयुषले दिएको पेनाल्टी क्षेत्रमा अनमार्क रहेका मोसेसलाई पास दिए पनि उनले सदुपयोग गर्न सकेनन् । मोसेसले ७७औं मिनेटमा पनि गोल गर्ने अवसर खेर फाले ।
८२औं मिनेटमा मोसेसको अर्को प्रहार गोललाइनबाट पोखराका डिफेन्डर आन्द्रेसले क्लियर गर्दै टोलीको थप संकट टारे । तर, त्यसको एक मिनेटपछि नै पोखराले गोल फर्कायो । पोखरा थन्डर्सका डिफेन्डर शतर्क नरहँदा काठमाडौंका एनकेङग्युले गोल गर्दै बराबरीमा ल्याए । करिब १८ यार्डमा पोखराका चार डिफेन्डर रहे पनि उनको सहज रूपमा लेफ्ट फुटेट प्रहार गोलमा परिणत भयो । इन्जुरी समयको पहिलो मिनेटमा पेम्बा लामाको पेनाल्टी क्षेत्र बाहिरबाट गरेको प्रहार पोखराका गोलकिपर प्रिसोका लागि खासै चुनौति बनेन् ।
९३औं मिनेटमा काठमाडौंले काउन्ट अट्याकमा अर्को गोल फर्कायो । तोजिडिनोभ कोमिवनको लामो पास नियन्त्रणमा लिँदै सोखरुख एमले पोखराको गोलकिपर प्रिसो अगाडि बढेको अवस्थामा खाली पोस्टमा गोल गरे । यससँगै अन्तिम १० मिनेटमा खेलले नाटकीय मोड लिँदा दबाबमा रहेको काठमाडौंले पोखरामाथि रोमाञ्चक जित निकाल्यो ।
