काठमाडौं । अभिनेत्री स्वस्तिमा खड्का र अभिनेता अर्पण थापाको मुख्य भूमिका रहेको फिल्म ‘चिसो मान्छे’को सुटिङ प्याकअप भएको छ ।
फागुन १७ गते मुहूर्त गर्दै ललितपुरबाट सुरु गरिएको फिल्मको छायांकन शनिबार बझाङ पुगेर सकिएको हो । क्यामेरा ‘अन’ भएको २७ दिनमा फिल्मको सुटिङ प्याकअप भएको फिल्मका निर्देशक दीपेन्द्र के. खनालले बताए ।
फिल्ममा अनुभवी कलाकारहरु भएका कारण समयमै छायांकन सकिएको उनी बताउँछन् ।
केही समयपहिले चर्चामा रहेको फिल्म ‘आमा’की निर्मात्री शर्मिला पाण्डेको लगानीमा निर्माण भएको फिल्ममा स्वस्तिमा खड्का र अर्पण थापासँगै देशभक्त खनाल, आशान्त शर्मा, झकेन बीसी लगायतका कलाकारको पनि अभिनय रहेको छ ।
फिल्मको कथा, पटकथा, संवाद र छायांकन निर्देशक खनाल स्वयंले गरेका छन् । उनले फिल्म सोचेको जस्तै बनेको पनि बताएका छन् ।
कोरोना महामारीका बेला झेल्नुपरेको लकडाउनको समयमा मलेशियाबाट आएको लास काठमाडौंबाट बाजुरासम्म पुर्याउँदाको कथालाई फिल्ममा प्रस्तुत गरिनेछ । फिल्मलाई आउँदो भदौ ११ गते प्रदर्शनमा ल्याइने बताइएको छ ।