नेपियरः न्यूजील्यान्ड भ्रमणमा रहेको बंगलादेशी क्रिकेट टोली न्यूजील्यान्डसँगको दोस्रो टी२० क्रिकेटमा पनि २८ रनले पराजित भएको छ । यो जितसँगै न्यूजीन्यान्डले तीन म्याचको यस शृंखलामा २–० ले अग्रता बनाएको छ ।
वर्षाले प्रभावित यस खेलमा पहिले टस जितेर बंगलादेशले पहिले फिल्डिङ रोजेको रोजेको थियो ।
न्यूजील्यान्डले पहिले ब्याटिङ गर्दै १७.५ ओभरमा ५ विकेट गुमाएर १७५ रन बनाएको थियो । जसमा ग्लेन फिलिप्सले ५८, डेरिल मिचेलले ३४, मार्टिन गप्टीलले २१, फिन अल्लेनले १७, डेभोन कन्वेले १५ रन बनाएका थिए ।
बंगलादेशका लागि महेदी हसनले २, मोहम्मद सैफुद्दिन, तास्किन अहमद र सोरिफुल इस्लामले समान १–१ विकेट लिएका थिए ।
जवाफमा १७६ रनको लक्ष्य लिएर मैदान प्रवेश गरेको बंगलादेशले १६ ओभरमा ७ विकेट गुमाएर १४२ रन मात्र बनाउन सक्यो । वर्षाका कारण छोट्याइएको यस खेलमा बंगलादेशका लागि सौम्य सर्कारले ५१, मोहम्मद नइमले ३८, मोहम्मदुल्लाहले २१ रन बनाएका थिए ।
यसअघिको पहिलो खेलमा पनि न्यूजील्यान्डले बंगलादेशलाई ६६ रन अन्तरले पराजित गरेको थियो ।
यी दुईबीच तेस्रो तथा अन्तिम टी२० आगामी बिहीबार अक्ल्यान्डमा हुनेछ । AP
#New Zealand_vs_Bangladesh #T20I
