लन्डनः म्यान्चेस्टर सिटीको प्रभावशाली फर्वार्ड एवं गोलकर्ता सर्जियो अग्वेरोले यसै सिजनको अन्तदेखि क्लब छाड्ने भएका छन् । सिटीले अग्वेरोसँगको अनुबन्द यसै सिजनबाट अन्त्य भएको र उनको म्याद नथप्ने घोषणा गरेको छ ।
३२ वर्षीय अग्वेरोको करार यसै सिजनको अन्त्यदेखि समाप्त हुँदैछ र उनलाई म्याद नथपिने सूचना दिइसकेको क्लबले जनाएको छ ।
अर्जेन्टिनाको राष्ट्रिय फुटबल टिमका प्रभावशाली सदस्य समेत रहेका अग्वेरोले सन् २०११ मा एट्लेटिको म्याड्रिड छाडेर सिटीमा आएका थिए । करिब १० वर्षको अन्तरालमा सिटीका लागि ३८४ खेल खेल्दै उनले २५७ गोल गरिसकेका छन् ।
अग्वेरोले आफूले सिटीमा रहेर ठूलो सम्मान र मौका पाएको बताएका छन् । उनको सम्झनामा एतिहाद रंगशालामा एउटा शालिक पनि राखिने छ । उनीसँगै सन् २०१९ र २०२० मा क्लबबाट बिदा भएका भिन्सेन्ट कोम्पानी र डेभिड सिल्भाको शालिक पनि राखिने क्लबले जनाएको छ ।
उनलाई स्पेनी महारथी बार्सिलोना क्लबले अनुबन्ध गर्ने यसअघि हल्ला चलेपनि अझै निर्णय भइसकेको छैन । AFP
#Sergio_Aguiro
