तनहुँ । भिमाद एफ.एम १००.९ मेगाहर्जले देउसी भैलोबाट संकलित रकम सहयोग गरेको छ । कार्तिक २६ देखि ३० गतेसम्म मौनता ब्याण्ड र स्थानीय कलाकारहरुको सहभागितामा आयोजित देउसी भैलो कार्यक्रमबाट संकलित १५ हजार रुपैयाँ दीर्घरोगीलाई सहयोग गरिएको हो ।
कला, संस्कृति र चाडपर्वको मौलिकतालाई जोगाउने मुख्य उद्देश्य सहित आयोजित देउसी भैलो कार्यक्रमबाट संकलित रकम भिमाद नगरपालिका वडा नं-२ अकला प्रगतिशिल टोल निवासी क्यान्सर पिडित लोक मायाँ थापालाई ५ हजार, सवारी दुघर्टनामा घाइते भई प्यारालाइसिस भएका भिमाद नगरपालिका वडा नं-२ हैदगा निवासी बेल बहादुर सार्कीलाई ५ हजार रबौदीकाली गाउँपालिका वडा नं स्थायी घर भई हाल भिमाद नगरपालिका वडा नं-६ मालेबगर निवासी राजु कुमार सुनारलाई ५ हजार सहयोग गरिएको भिमाद एफएम १००.९ मेगाहर्जका अध्यक्ष मिलन आलेले जानकारी दिए ।
सुनार २१ महिना पहिले सवारी दुघर्टनामा परी मेरुदण्ड पक्षघात भई उपचारको क्रममा रहेका छन् । भिमाद एफएमले गरेको सहयोगले उपचारमा केही राहत हुने बिरामीहरुका आफन्तले बताएका छन् ।
सो अवसरमा एफएमका अध्यक्ष मिलन आले, उपाध्यक्ष ध्रुव राज सुवेदी लगायतले आगामी दिनहरुमा समेत यस्तै सामाजिक कार्यहरु गर्ने प्रतिबद्धता जनाएका छन् ।
जाजरकोटका भूकम्प पिडितको लागि समेत सहयोग गर्ने भिमाद एफएमको तयारी छ ।
