काठमाडौं । नेकपा एमालेका अध्यक्ष केपी शर्मा ओलीले चुनाव जित्न मान्छे मार्नेहरु सरकारमा पुगेको आरोप लगाएका छन् । समृद्धिको लागि संकल्प यात्राअन्तर्गत अछामको विनायकमा आयोजित संक्षिप्त कार्यक्रमलाई सम्बोधन गर्दै ओलीले यस्तो बताएका हुन् ।
अध्यक्ष ओलीले चुनाव जित्नको लागि मानिस मार्न समेत पछि नपर्ने संस्कृति अपराध मात्र नभएर अति घिनलाग्दो संस्कृति विकास भएको बताए ।
ओलीले अछामका विनोद शाहीलाई बेपत्ता बनाइ हत्या गरिएकोमा खेद व्यक्त गर्दै एउटा होनहार युवाको हत्या गरेर अत्यन्तै घिनलाग्दो काम गरिएको बताए । उनले भने ‘ एउटा मान्छे मारेर चुनाव जित्ने संस्कृति भनेको घिनलाग्दो हो । म विनोद शाहीलाई शहीद घोषणा गर्दछु’। अछाम पञ्चदेवल– ४ का १५ वर्षीय विनोद ०७९ जेठ २१ गते मृत अवस्थामा भेटिएका थिए ।
अहिलेको सरकारले हत्यारालाई माफी दिने र मुद्दा चलाउन नमान्ने ओलीको आरोप छ । अदालतले सर्वश्व हरण सहित जन्म कैद गरेकालाई तुरुन्त मुद्दा फिर्ता लिने काम सरकारले गरेको उनको भनाई छ ।
