काठमाडौँ । राष्ट्रिय दलित आयोगका अध्यक्ष देवराज विश्वकर्माले नेपाल प्रहरीले दलित समुदायलाई जबरजस्ती फसाउने गरेको आरोप लगाउनुभएको छ ।
शुक्रवार काठमाडौंमा आयोजित एक कार्यक्रममा बोल्दै उहाँले धेरै निर्दोष दलितलाई फसाएर नेपाल प्रहरीले जेल चलान गर्ने गरेको भन्दै आक्रोश व्यक्त गर्नुभएको हो । उहाँले दलितहरुलाई फसाउने काम नगर्न भनेर आफूले पटकपटक प्रहरी नेतृत्वलाई भन्ने गरेको गुनासो पनि गर्नुभयो । अध्यक्ष विश्वशर्माले दलित समुदायले कानून नजानेर फस्ने गरेको भन्ने नेपाल प्रहरीको भनाईमा सत्यता नरहेको जिकिर समेत गर्नुभयो । उहाँले दलितहरुलाई फसाउने काम हुन नदिन आयोगले नेपाल प्रहरीसँग मिलेर काम गर्ने योजना बनाएको बताउनु भयो ।
अध्यक्ष विश्वकर्माले भन्नुभयो, ‘नेपाल प्रहरीले दलितहरुलाई जबरजस्ती फसाईराखेको छ । मैले नेपाल प्रहरीको आइजीपीलाई पनि यो कुरा भनेको छु–मिलेर यो कुरा बुझाउ । उहाँले पनि आयोग र हामी मिलेर यो कुरा बुझाउ भन्नुभएको छ । त्यो काम गर्न हामी प्रयत्नशील छौं । अघि बढाइएको छ । त्यो चाहीँ सत्य होइन कि कानूनको अनविज्ञ भएर पनि दलित समुदाय जेलमा धेरै भएका होइनन् । उनीहरुलाई फसाइएको हो ।’
कार्यक्रममा बोल्दै प्रहरी निरीक्षक शारदा थापाले कानूनको जानकारी नभएका कारण पनि दलित समुदाय मुद्दा मामिलामा फस्ने गरेको दाबी गर्नुभयो ।
