काठमाडौँ । केपी ओली कप टी–२० राष्ट्रिय क्रिकेट प्रतियोगिताको उपाधि मधेश प्रदेशले जितेको छ । शुक्रबार फाइनलमा त्रिभुवन आर्मी क्लबलाई ११ रनले पराजित गर्दै मधेश प्रदेशले उपाधि जितेको हो ।
मधेशले दिएको १ सय ३६ रनको लक्ष्य पछ्याएको आर्मीले निर्धारित २० ओभरमा ८ विकेट गुमाउँदै १ सय २४ रनमात्र बनाउन सक्यो । आर्मीका कप्तान विनोद भण्डारीले ३२, सोमपाल कामी १६ र विवेक यादव २५ रनमा अविजित रहे भने सन्तोष कार्कीले १६, रोहित पौडेलले ५, राजेश बुढामगरले ३, बसिर अहमदले २, भीम सार्कीले २२ रन बनाए ।
बलिङतर्फ मधेसका कप्तान हरिशंकर शाहले सर्वाधिक ४ विकेट लिए । यस्तै, प्रदीप पासवानले २ र प्रतीक यादवले १ विकेट लिए ।
यसअघि पोखरा रंगशालास्थित क्रीकेट मैदानमा टस जितेर पहिला ब्याटिङ गरेको मधेसले निर्धारित २० ओभरमा ८ विकेट गुमाउँदै १ सय ३५ रन बनाएको थियो । मधेसका विशाल पटेलले ४९, कप्तान हरिशंकर शाहले २७ रनको योगदान दिएका थिए ।
बलिङतर्फ आर्मीका साहब आलम र विवेक यादवले ३–३ तथा सोमपाल कामी र बसिर अहमदले १–१ विकेट लिए । विजेता टोली मधेसले उपाधिसँगै नगद ५ लाख हात पार्यो । पराजित आर्मीले २ लाख ५० हजारमा चित्त बुझायो ।
