काठमाडौँ । केपी ओली टि२० कपको दोस्रो सेमिफाइनल खेलमा मधेश प्रदेशले नेपाल एपिएफ क्लबलाई १ सय ९८ रनको विशाल लक्ष्य दिएको छ ।
पोखरा रंगशालामा टस जितेर पहिला ब्याटिङ गरेको मधेशले निर्धारित २० ओभरमा ६ विकेट गुमाएर १ सय ९७ रन बनायो ।
मधेशका ओपनर अनिल शाहले र इमरान शेखले उत्कृष्ट अर्धशतकिय इनिङ खेले । अनिलले ३६ बलमा २ चौका र ६ छक्का प्रहार गर्दै ५७ रन बनाए । इमरानले ३२ बलमा ३ चौका र ४ छक्कासहित ५० रन जोडे । दोस्रो विकेटका लागि अनिल र इमरानले ९२ रनको साझेदारी गरेका थिए । पवन सरार्फ ३३, रुपेश सिंह २१, हिमान्शु दत्त १५, कप्तान हरिशंकर शाह १० तथा विशाल शुश्लिङ र मयन यादवले समान ४ रन बनाए ।
एपिएफका स्पिनर मौसम ढकालले सर्वाधिक ३ विकेट लिदा अमरसिंह राउटेलाले २ विकेट लिए ।
यस खेलको विजेताले फाइनलमा शुक्रबार आर्मीसँग खेल्नेछ ।
