पोखरा । पोखरामा जारी केपी ओली कप टि( २० क्रिकेट प्रतियोगिताअन्तर्गतको समुहचरण खेलमा सुदुरपश्चिम प्रदेशले नेपाल पुलिस क्लबलाई पराजित गरेको छ । यससँगै पुलिसको सेमिफाईनल यात्रा यहि सकिएको छ ।
१ सय ५९ रनको लक्ष्य पछ्याएको सुदुरपश्चिमले १८.४ ओभरमा पूरा गर्यो । सुदुरपश्चिमका किरण थगुन्नाले सर्वाधिक ५१ रन बनाए ।
कुनै समय ४६र५ को स्थितीमा रहेको सुदुरपश्चिमको लागि किरण थगुन्नाले र नरेन शाउदले उत्कृष्ट साझेदारी गरे । कप्तान राजु रिजालले १९ र बसन्त कार्कीले १५ रनको योगदान दिए ।
बलिङतर्फ पुलिसका रशिद खानले सर्वाधिक तीन विकेट लिए भने सुनिल धमला र सागर ढकालले १/१ विकेट लिए ।
त्यसअघि पोखरा रंगशालास्थित क्रिकेट मैदानमा पहिले ब्याटिङ गरेको पुलिसले निर्धारित २० ओभरमा ४ विकेट गुमाउँदै १ सय ५८ रन बनाएको थियो । पुलिसको लागि ओपनर कुशल भुर्तेलको उत्कृष्ट अर्धसतक बनाएका थिए । तर उनको अर्धशतक जितको लागि प्रयाप्त भएन । भुर्तेलले ५१ बलमा ६७ रन बनाएर आउट भएका थिए । सुनील धमालाले ४२, अर्जुन साउदले २०, कप्तान आरिफ शेखले २,दीलिप नाथ ४ र करण केसीले ७ रन बनाए ।
बलिङतर्फ सुदुरपश्चिमका विकाश आग्रीले सर्वाधिक २ विकेट लिए । वसन्त खत्री र भोजराज भट्टले समान एक विकेट लिए।
सुदूरपश्चिमसँग हार बेहोरेसँगै नेपाल पुलिस क्लब सेमिफाईनल नपुग्दै बाहिरिएको छ । समूह सी मा रहेका मधेस प्रदेश र नेपाल पुलिस क्लबको समान २-२ अंक भएपनि रननेटको आधारमा मधेश सेमिफाईनलमा पुगेको छ ।
यसअघि एपीएफ र बागमती प्रदेश सेमिफाइनलमा प्रवेश गरिसकेका छन् ।
