काठमाडौँ । प्रधानमन्त्री पुष्पकमल दाहाल ‘प्रचण्ड’ बुधबार संयुक्त अरब इमिरेट्स (युएई) जानुहुने भएको छ । जलवायु परिवर्तनसम्बन्धी सम्मेलन कोप–२८ मा सहभागी हुन उहाँ त्यसतर्फ जानुहुने भएको हो । कोप २८ मंसिर १४ देखि २६ सम्म युएईको दुबईमा हुँदैछ । सम्मेलनमा सहभागी हुने नेपाली प्रतिनिधिमण्डलको नेतृत्व गर्दै प्रधानमन्त्री प्रचण्ड बुधबार जानुहुनेछ ।
भ्रमण टोलीमा प्रधानमन्त्री पुत्री गंगा दाहाल, वन तथा वातावरणमन्त्री वीरेन्द्र महतोका साथै उच्च सरकारी अधिकारीहरु रहेको बताइएको छ ।
प्रधानमन्त्रीले १६ गते (शनिबार) सम्मेलनलाई सम्बोधन गर्नुहुने कार्यक्रम तय भएको परराष्ट्र मन्त्रालयले जनाएको छ ।
सम्मेलनका क्रममा प्रधानमन्त्री प्रचण्डले द्वीपक्षीय भेटवार्ताहरु पनि गर्नुहुनेछ । साथै उहाँले भ्रमणका क्रममा त्यहाँ रहेको नेपाली दूतावासमा जानुहुने र नेपाली समुदायका साथै नेपाल–यूएई व्यवसायी सम्मेलनलाई समेत सम्बोधन गर्नुहुनेछ ।
