काठमाडौं । राष्ट्र राष्ट्रियता धर्म संस्कृति र नागरिक बचाउ महाअभियान भन्दै मंसिर ७ गतेदेखि आन्दोलनको घोषणा गरेका व्यवसायी दुर्गा प्रसाईंको प्रर्दशन रत्नपार्कमा गर्ने तयारी भएपनि स्थानीय प्रशासनले बालाजु वा अन्य कुनै क्षेत्र तोक्ने तयारी गरेको छ ।
सुरक्षाको कारण देखाउँदै जिल्ला प्रशासन कार्यालय काठमाडौंले माइतीघरदेखि बानेश्वरसम्म निषेधित क्षेत्र घोषणा गरेपछि प्रसाईंको कार्यक्रम रत्नपार्कमा गर्ने तयारी रहेको छ ।
काठमाडौंका प्रमुख जिल्ला अधिकारी जितेन्द्र बस्नेतले न्युजपोलारसंग भन्नुभयो “उहाँहरुलाई बालाजु वा पश्चिम क्षेत्रको कुन स्थान दिने भन्नेबारेमा छलफल भै रहेको छ । रत्नपार्कमा हुदैन होला ।” उहाँले भन्नुभयो “शान्तिपूर्ण प्रर्दशनका लागि हामी स्थान तोकिदिन्छौ तर सामाजिक सद्भाव भड्कने ,वा शान्ति सुरक्षाका खललपुग्ने अबस्था देखिए प्रर्दशन रोक्न पनि सक्छौ ।”
मंसिर ७ गते प्रसाई र नेकपा एमालेको भातृ संगठन युवा संघको कार्यक्रम जुधेपछि जिल्ला प्रशासन कार्यालय काठमाडौंले माइतीघरदेखि बानेश्वरसम्म निषेधित क्षेत्र घोषणा गरेको थियो ।
माइतीघरमा कार्यक्रम गर्न नपाउने भएपछि युवा संघले तीनकुनेमा कार्यक्रम गर्ने जनाएको छ ।
