काठमाडौँ । प्रसिद्ध नेत्र चिकित्सक तथा तिलगंगा आँखा अस्पतालका निर्देशक डा सन्दुक रुइत र वैज्ञानिक एवं राष्ट्रिय आविष्कार केन्द्रका अध्यक्ष महावीर पुनसहित विभिन्न क्षेत्रमा कार्यरत १० जनालाई सम्मान प्रदान गरिएको छ ।
अमेरिकाको नर्दन क्यालिफोर्नियामा अवस्थित नीलकृष्ण जसोदा सिटौला फाउन्डेसनले शनिबार राजधानीमा एक कार्यक्रमको आयोजना गरेर उनीहरुलाई सम्मान तथा पुरस्कार प्रदान गरेको हो ।
सम्मान प्राप्त गर्नेमा पूर्वराजदूत प्रल्हादकुमार प्रसाईँ, कवि नवराज पराजुली, इन्जिनियर रामबिन्दु श्रेष्ठ, पत्रकार अरुणदेव जोशी, समाजसेवी सरु सुवेदी, शिक्षक होमनाथ न्यौपाने र गायिका सिम्रन परियार रहेका छन् ।
त्यस्तै फाउन्डेसनले वरिष्ठ समालोचक एवम् साहित्यकार दधिराज सुवेदी, प्राज्ञ एवम् गीतकार उन्नति बोहोरा शिला, प्राध्यापक एवम् साहित्यकार फणिन्द्रराज निरौला, साहित्यकार सुशीला ढकाल अधिकारी, समाजसेवी प्रेमप्रकाश सिटौला र गायिका कोपिला शिवाकोटीलगायतलाई सम्मान प्रदान गरेको हो ।
इन्जिनियर इश्वरकान्त सिटौलाले २०१७ मा आफ्नै बाबु आमाको नाममा नीलकृष्ण जसोदा सिटौला फाउन्डेसन स्थापना गरी समाजका विभिन्न क्षेत्रमा विशिष्ट योगदान पुर्याउने व्यक्तित्वहरुलाई सम्मान प्रदान गर्दै आएको छ ।
हरेक वर्ष विभिन्न पेशा, व्यवसायमा सक्रिय रहँदै आएका विज्ञ, संस्था, समाजसेवी र स्रष्टाहरूलाई सम्मान गर्दै आएको नीलकृष्ण जशोदा सिटौला फाउन्डेसन नर्दन क्यालिफोर्नियाका इन्जिनियर ईश्वरकान्त सिटौलाले स्थापना गरेका हुन् ।
