सिरहा । गोलबजार नगरपालिका–३ जमदहस्थित सरस्वती प्राथमिक विद्यालयका प्रधानाध्यापक सञ्जीवकुमार साहको मृत्यु प्रकरणमा भोलि मंगलबार शिक्षकहरुले आन्दोलन गर्ने भएका छन् ।
विद्यालयमै झुण्डिएको अवस्थामा मृत फेला परेका प्रधानाध्यापक साहको मृत्यु शंकास्पद रहेको भन्दै शिक्षकहरुका पेशागत संगठनहरुको संयुक्त बैठकले भोलि जिल्लाभरका विद्यालय बन्द गर्ने निर्णय गरेको हो ।
शिक्षकहरुका आठ पेशागत संगठनका जिल्ला अध्यक्षहरुले संयुक्त रुपमा एक विज्ञप्ति जारी गर्दै सत्य तथ्य निष्पक्ष छानविन गरी दोषी पत्ता लगाउन दबाब स्वरुप भोली जिल्लाभरका विद्यालय र गोलबजार नगरपालिकाका विद्यालयहरु अनिश्चितकालका लागि बन्द गर्ने निर्णय गरेका हुन् । साथै भोलि सरस्वती माविमा हुने संघर्षका कार्यक्रममा उपस्थित हुन शिक्षकहरुलाई अपिल गरिएको छ ।
प्रधानाध्यापक साह आइतबार बिहान विद्यालयको निमार्णधीन तेस्रो तल्लाको सभाहलमा झुण्डिएको अवस्थामा फेला परेका थिए ।
