काठमाडौँ । नेपाल चिकित्सक संघले ललितपुरस्थित पाटन अस्पतालका चिकित्सकहरूमाथि कुटपिट भएको भन्दै विरोध जनाएको छ ।
ज्येष्ठ नागरिक वार्डमा कार्यरत चिकित्सक तथा स्वास्थ्यकर्मीहरूमाथि गत कात्तिक १८मा बिरामीका आफन्तले कुटपिट गरेको भन्दै संघले विरोध गरेको हो ।
पाटन अस्पतालमा उपचाररत ओखलढुंगाकी ९६ वर्षीया जनमाया राई र मकवानपुरका ६७ वर्षका कृष्ण नगरकोटीको मृत्यु भएको थियो । सुईमार्फत दिएको औषधिको कारणले मृत्यु भएको भन्दै दुबै बिरामीका आफन्त आक्रोशित भएका थिए।
सोमबार एक विज्ञप्ति जारी गर्दै संघका महासचिव डा. सञ्जिव तिवारीले ज्येष्ठ नागरिक वार्डमा कार्यरत चिकित्सक तथा स्वास्थ्यकर्मीहरूमाथि भएको कुटपिट, गालीगलौच र ज्यान मार्ने धम्की दिई अमानवीय क्रियाकलाप गरिएको प्रति नेपाल चिकित्सक संघको गम्भीर ध्यानाकर्षण भएको र घटनामा संलग्न दोषीहरूलाई कानुनी कारबाहीको माग गरेका छन् । साथै, उनले पाटन अस्पतालमा उपचार गराइरहेका बिरामीको मृत्युको कारण खुलाउन आग्रह गरेका छन् ।
