काठमाडौँ । प्रमुख प्रतिपक्ष दल नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले संयुक्त राष्ट्र संघका महासचिव एन्टोनियो गुटेरेसले संघीय संसदलाई गर्नुभएको सम्बोधन धेरै राम्रो रहेको बताउनुभएको छ ।
मंगलवार महासचिव गुटेरेसले संघीय संसदलाई सम्बोधन गरेलगत्तै उहाँले सञ्चारकर्मीमाझ सो प्रतिक्रिया दिनुभएको हो । त्यस अवसरमा अध्यक्ष ओलीले संसदमा गर्नुभएको सम्बोधनका लागि महासचिव गुटेरेसलाई धन्यवाद समेत व्यक्त गर्नुभयो । उहाँले महासचिव गुटेरेसले नेपालको र नेपाली राष्ट्रबारे राम्रो मूल्यांकन गरेको धारणा राख्नुभयो ।
गुटेरेसले पीडित केन्द्रित भएर नेपालको सर्वोच्च अदालत र विश्व मानव अधिकार परिषदको सुझावलाई ध्यानमा राखेर नेपालले शान्ति प्रक्रियाको कामलाई निष्कर्षमा पु¥याउनुपर्ने बताएको उल्लेख गर्दै अध्यक्ष ओलीले त्यसले छिट्टै पूर्णता पाउने कामना समेत गरेको बताउनु भयो । उहाँले वातावरणीय विनाश रोक्न नेपालले दिएको योगदानको पनि खुलेर महासचिव गुटेरेसले प्रशंशा गरेको पनि बताउनु भयो ।
अध्यक्ष ओलीले भन्नुभयो, ‘संयुक्त राष्ट्र संघका महासचिव महामहिम एन्टोनियो गुटेरेसले केही महत्वपूर्ण विषयहरु प्रकाश पार्नुभएको छ । नेपालको संसदको दुवै सदनको संयुक्त बैठकलाई सम्बोधन गर्दै उहाँले वातावरणको बारेमा, त्यसै गरेर गरिवी निवारणको बारेमा, अरु शान्ति प्रक्रियालाई टुंग्याउने बारेमा, विभिन्न विषयमिा उहाँले प्रकाश पार्नु भएको छ । र, नेपालको, नेपाली राष्ट्रको उहाँले राम्रो मूल्यांकन गर्नुभएको छ । र, गरिव देशहरुलाई सम्पन्न देशहरुले सहयोग, समर्थन गर्नुपर्छ । र, संयुक्त राष्ट्र संघमा जनाएका प्रतिवद्धता अनुरुप वातारणीय विनाश रोक्न नेपालको सजगता र योगदानप्रति उहाँले विशेष प्रशंशा गर्नुभएको छ ।
शान्ति प्रक्रियालाई उपयुक्त ढंगले पीडित केन्द्रित भएर ट्रान्जिशनल जष्टिस उनीहरुलाई उपलब्ध गराएर नेपालको सुप्रिम कोर्ट र विश्व मानव अधिकार परिषदका सुझावहरु समेतलाई ध्यानमा राखेर यसलाई समाधान गर्नु पर्छ । सकेसम्म छिटो समाधान होस् भन्ने कामना गर्नुभएको छ । र, म मेरो पार्टीको तर्फबाट उहाँहरुलाई धेरै धन्यवाद भन्न चाहन्छु । हामी हामी सिंगै संसदले उहाँलाई धन्यवाद भनेका छौं । उहाँको सम्बोधन संक्षिप्तमा भन्दा धेरै राम्रो छ ।’
अध्यक्ष ओलीले महासचिव गुटेरेसले आफ्नो सम्बोधनमार्फत गरिव देशहरुलाई सम्पन्न देशहरुले सहयोग र समर्थन गर्नुपर्छ भन्ने स्पष्ट सन्देश दिएको पनि बताउनु भयो ।
