एजेन्सी । आईसीसी क्रिकेट विश्वकप २०२३ को २१ औँ खेलमा आज अपराजित भारत र न्युजिल्यान्ड आमनेसामने हुँदैछन् ।
आइतबार धर्मशालास्थित हिमाचल प्रदेश क्रिकेट एसोसिएसन स्टेडियममा हुनलागेको खेल नेपाली समयअनुसार दिउँसोको २:१५ बजेबाट सुरु हुनेछ ।
न्युजिल्यान्डले साविक विजेता इंग्ल्याण्डलाई ९ विकेटले हराएर प्रतियोगिताको सुरुवात गरेको थियो । यस्तै, नेदरल्यान्ड्स ९९ रन, बंगलादेशलाई आठ विकेट र अफगानिस्तान १४९ रनले पराजित गरेको थियो ।
यता भारतले पनि अस्ट्रेलियालाई ६ विकेटले, अफगानिस्तानलाई आठ विकेट, कट्टर प्रतिद्वन्द्वी पाकिस्तानलाई सात विकेट र बंगलादेशलाई सात विकेटले हराउदै विश्वकपमा अपराजित यात्रा गरेको छ ।
आजको खेल जित्दै न्युजिल्यान्ड र भारत दुबै आफ्नो अपराजित यात्रा कायम गर्न चाहन्छ ।
भारतका स्टार अलराउन्डर हार्दिक पाण्ड्याले आजको खेल गुमाउनेछन् । बिहीबार बंगलादेशविरुद्धको खेलमा बलिङ गर्दा दाहिने खुट्टामा चोट लागेपछि उनी आजको खेलबाट बाहिर भएका छन् । उनको ठाउँमा कसले लिने भन्ने लाखौंको प्रश्न हो। भारतले उनको स्थानमा सूर्यकुमार यादव वा इशान किशनलाई खेलाउन सक्छ ।
यता, न्युजिल्यान्ड पनि कप्तान केन विलियम्सन बिना नै रहन्छ । विलियम्सन औंला भाँचिएपछि खेल बाहिर रहेका छन् । उनको स्थानमा टम लाथमले कप्तानी गरिरहेका छन् ।
हेड-टु-हेड
भारत र न्युजिल्यान्डले हालसम्म १ सय १६ एकदिवसीय अन्तर्राष्ट्रिय खेलेका छन् । जसमा भारतले ५८ खेल जितेको छ भने न्युजिल्यान्डले ५० खेल जितेको छ । सात खेल नतिजाविहीन र एउटा बराबरीमा सकिएको छ ।
भारतको सम्भावित प्लेईङ ११
रोहित शर्मा (कप्तान), शुभमन गिल, विराट कोहली, श्रेयस अय्यर, केएल राहुल (विकेटकिपर), रविन्द्र जडेजा, सूर्यकुमार यादव/इशान किशन, शार्दुल ठाकुर/मोहम्मद शामी, जसप्रित बुमराह, कुलदीप यादव, मोहम्मद सिराज ।
न्यूजिल्याण्डको सम्भावित प्लेईङ ११
डेभोन कोनवे, विल यंग, रचिन रविन्द्र, टम लाथम (कप्तान र विकेटकीपर), डेरिल मिचेल, ग्लेन फिलिप्स, मार्क च्यापम्यान, मिचेल सान्टनर, म्याट हेनरी, लोकी फर्ग्युसन, ट्रेन्ट बोल्ट ।
