काठमाडौँ । सरकारले इजरायलबाट नेपाल फर्कन चाहने थप १९ जनाको उद्धार गरेको छ ।
इजरायलमा विद्रोही समूह हमासले आक्रमण गरेपछि स्वदेश फर्किनका लागि अनलाइन आवेदन दिएका १९ जनालाई सरकारले भारतीय जहाजमार्फत् उद्धार गरेको हो ।
परराष्ट्र मन्त्री एनपी साउदले मंगलबार इजरायलको तेल अभिभबाट १९ नेपालीको उद्धार गरिएको जानकारी दिए । ‘१९ जना नेपाली नागरिक तेल अविवबाट इन्डियन रेस्क्यु फ्लाइटबाट उड्दै हुनुहुन्छ’, उनले भने ।
तेल अभिभको स्थानीय समयअनुसार बिहान ९ बजे स्पाइस जेटमार्फत् १९ नेपाली नागरिक आउने परराष्ट्र मन्त्रालयले जनाएको छ । इजरायलबाट नन्दसिंह भुल, सुजेन्द्र खड्का, प्रतिभा रौनियार, अनुमा डंगोल, हिना खाँण, आतिस गुरुङ, जुनु गुरुङ, मौसमी पाख्रिन, प्रतिमा तिम्सिना, राजकुमार मानन्धर, संगीता दुलाल, उर्मिला रावल, ममता थापा, दिलकुमारी अधिकारी कार्की, निश्चल श्रेष्ठ, समिता बस्नेत, अम्बिका सुवेदी, सिरता गुरुङ र उर्मिला श्रेष्ठ नेपाल फर्कन लागेका हुन् ।
उनीहरुलाई दिल्लीस्थित दूतावासले सवारी साधनको व्यवस्था गरेर नेपाल पठाउने तयारी गरिएको मन्त्री साउदले बताए । नयाँ दिल्लीस्थित नेपाली दूतावासले उनीहरुलाई गौरीफन्टा नाका भएर कैलाली भित्र्याउने छ। कैलालीबाट जिल्ला प्रशासन कार्यालयले उनीहरूलाई सम्बन्धित स्थानमा पुर्याउने तयारी गरिएको छ।
उनीहरू मङ्गलवार बेलुकी ६/७ बजेसम्म नयाँ दिल्ली आईपुग्ने बताइएको छ ।
