काठमाडौँ । यू–१९ प्रिमियर कपमा नेपालले कप्तान देव खनालको शतक र उत्कृष्ट बलिङमा इरानलाई २ सय ७४ रनले पराजित गरेको छ ।
नेपालले जितका लागि दिएको ३ सय ५४ रनको विशाल विजयी लक्ष्य पछ्याएको इरान ३०.५ ओभरमा ७९ रन बनाएर अल आउट भयो ।
इरानका ओपनर आमेर खोर्सन्दले सर्वाधिक ३७ रन बनाए । साबेर इब्राहिमपुर ११ रनमा नट आउट रहँदा अन्य कुनैपनि इरानी ब्याटरले दोहोरो अंकमा रन बनाउन सकेनन् । इरानका ९ खेलाडीले दोहोरो अंकमा रन बनाउन सकेनन् ।
नेपालका दीपेश कँडेलले ७ ओभरमा ३ मेडनसहित ४ रन खर्चेर ३ विकेट लिए । सुवास भण्डारीले ८.५ ओभरमा ४ मेडनसहित ६ रन खर्चेर ३ विकेट लिँदा हेमन्त धामी र आकाश चन्दले समान दुई दुई विकेट लिए ।
त्यसअघि मलेसियाको वाइएसडी युकेएम ओभल बाँगीमा टस हारेर पहिला ब्याटिङ गरेको नेपालले ४०.१ ओभरमा ३ सय ५३ रनमा अल आउट भएको थियो ।
नेपालको लागि कप्तान देव खनालले शानदार शतक प्रहार गरेका थिए । यस्तै, ओपनर दीपक बोहरा र दीपकप्रसाद डुम्रेले अर्धशतक बनाएका थिए । तेस्रो नम्बर क्रिजमा आएका कप्तान देवले ५०औँ बल खेल्दै १२ चौका र ४ छक्काको मद्दतमा एक सय रनको योगदान दिएका थिए । दीपक बोहराले ५९ बलमा ६५ रन बनाए । उनले चार चौका र २ छक्का हानेका थिए । पाँचौँ नम्बर क्रिजमा पुगेका दीपक डुम्रेले ४४ बलमा ६९ रन बनाए ।
देव र दीपकले तेस्रो विकेटका लागि एक सय ६६ रनको साझेदारी गरेका थिए । दीपेश कँडेलले २९, हेमन्त धामीले २३, आकाश चन्दले १९ र सुभास भण्डारी १८ रन जोडे ।
एसिसी प्रिमियर कप क्रिकेट प्रतियोगितामा एसियाका विभिन्न १६ एशोसिएट टोलीले प्रतिस्पर्धा गर्दैछन् । प्रतियोगिताका शीर्ष तीन टोलीले आगामी डिसेम्बरमा पाकिस्तानमा हुने यू–१९ एसिया कप खेल्न पाउने छन् ।
