एजेन्सी । बलिउड सुपरस्टार शाहिद कपुरको फ्यान फलोइङ निकै ठूलो छ । अभिनेताको पछिल्लो रिलिज फिल्मको कुरा गर्दा ‘फर्जी’ र ‘ब्लडी ड्याडी’ ले दर्शकलाई निकै प्रभावित बनाएको थियो ।
यी फिल्महरूमा आफ्नो भूमिकाको लागि शाहिदले धेरै प्रशंसा पाए । यतिबेला उनको अभिनेत्री कृति सेननसँग एउटा अनटाइटल फिल्म छ । यस बाहेक अब शाहिदले एउटा पौराणिक महाकाव्य पनि साइन गरेको खबर आइरहेको छ ।
मिडिया रिपोर्टका अनुसार शाहिद कपुरले वाशु भगनानी र ज्याकी भगनानीसँग हात मिलाइसकेका छन् । उनको आगामी फिल्म पौराणिक कथामा आधारित छ । शाहिद कपुरले महाभारतमा आधारित फिल्म साइन गरेका हुन् । उनी ‘महाभारत’को निकै महत्वपूर्ण पात्र कुन्तीका छोरा कर्णको भूमिकामा देखिने सम्भावना छ । यो फिल्म २०२१ मा वासु भगनानीको पूजा इन्टरटेनमेन्टले घोषणा गरेको थियो ।
यसअघि दर्शकले नदेखेको फिल्मलाई फरक ढंगले प्रस्तुत गर्ने तयारीमा फिल्म निर्माताहरु लागेको बताइएको छ । समाचार अनुसार शाहिदले सन् २०२४ मा फिल्मको सुटिङ सुरु गर्नेछन् । यस बाहेक निर्माताले फिल्मलाई हिन्दी, तमिल, तेलुगु, मलयालम र कन्नड गरी पाँच भाषामा रिलिज गर्ने योजना बनाएका छन् ।
