इन्जुरी समयको अन्तिम तीन मिनेटभित्र दुई गोल गरेर म्यान्चेस्टर युनाइटेडले इङलिस प्रिमियर लिगको अर्को टिम ब्रेन्टफोर्डलाई २–१ गोल अन्तरले पराजित गरेको छ ।
यसअघि ब्रेन्टफोर्डले २६ औं मिनेटमै माथियस यान्सेनले गोल गरेर टिमलाई अग्रता दिलाएका थिए । त्यसपछि निर्धारित ९० मिनेटसम्म गोल भएको थिएन ।
तर इन्जुरी समयको ९३औं र ९७ औं मिनेटमा म्यान्चेस्टरले जादूयी प्रदर्शन गरेको थियो । टिमका लागि स्कट म्याकटमेनीले तीन मिनेटको अन्तरालमा दुई गोल गरेर टिमलाई महत्वपूर्ण ३ अंक जुटाए । खासमा म्यान्चेस्टर युनाइटेड प्रिमियर लिगमा लगातार तेस्रो खेल हारको सम्मुखमा पुगेको थियो ।
तनाबमा रहेका म्यान्चेस्टरका प्रशिक्षक एरिक टेन हागले ८७औं मिनेटमा स्कट म्याकटमेनीलाई स्थानापन्न खेलाडीका रुपमा मैदानमा पठाएका थिए ।
यो जितसँगै युनाइटेडको ८ खेलबाट १२ अंक छ, र टिम लिगको १० औं स्थानमा छ । पहिलो स्थानमा टोटेनह्याम हस्पर छ ।
आजै सम्पन्न अन्य खेलहरुमा टोटेनह्यामले लुटोनलाई १–०, चेल्सीले बर्नलीलाई ४–१, एभर्टनले बर्नमाउथलाई ३–० तथा फुलह्यामले शन्डरल्यान्डलाई ३–१ ले पराजित गरेका छन् ।
