भक्तपुर । पूर्व राजा ज्ञानेन्द्र शाहबाट आज शक्तिको प्रतीक तलेजु भवानी र श्रीभैरवकोे पुजा गर्ने कार्यक्रम रहेको छ । भदौ शुक्ल नवमीको दिन भक्तपुरमा आउन लाग्नुभएका पूर्वराजा बाट आइतबार अपरान्ह भक्तपुरका प्रशिद्ध देवी देवताहरुको दर्शन र पुजाअर्चना गर्ने तय भएको छ ।
उहाँले भक्तपुर दरवार क्षेत्रको स्वर्णद्वारभित्र मुलचोकमा अवस्थित शक्तिको प्रतीक तलेजु भवानीको दर्शन र पुजा गरि प्रसाद ग्रहण गर्नुहुने कार्यक्रम रहेको तलेजु भवानीका पुजारी प्रा.डा.सिद्धिवीर कर्माचार्यले बताउनुभयो । प्रा.डा.कर्माचार्यका अनुसार तलेजु भवानीको नित्य पुजा भने आइतबार विहानै सम्पन्न भईसकेको छ ।
मल्लकालीन समय अर्थात १४ औं शताब्दिमा तलेजु भवानी काठमाण्डौ उपत्यकामा आएपछि तत्कालिन मल्ल राजाले १५ औं शताब्दिमा सो मन्दीर स्थापना गरिएको इतिहास छ । मल्ल राजाको ५५ झ्याले दरवारको पश्चितर्फको मुलचोकमा रहेको मन्दीरमा आसीन तलेजु भवानी दरवार र राजाको शक्तिसंग सम्वन्धित रहेको जनश्रुती रहेको छ ।
नेवार समुदायको प्रमुख आराध्यदेवी रहेकी तलेजु काठमाण्डौ उपत्यकाका काठमाण्डौ, भक्तपुर र ललितपुरका तत्कालिन मल्ल राजाहरुले आ—आफ्नो दरवारको आडैमा मन्दीर बनाएर विराजमान गराएर राखेका थिए । त्यसबेलादेखि तलेजुको नियमितरुपमा राजा, राजपरिवार र नेवार समुदायले विशेष पुजाआजा गर्दै आएका छन् भने आम हिन्दुहरुले पनि पुज्दै आएका छन् । शक्तिकी देवी तलेजु भवानीको मन्दीर वर्षमा एक पल्ट बडादशैंको नवौं दिन अर्थात नवमीको दिनमा मात्रै सर्वसाधारणको लागि खोल्ने गरिन्छ ।
तलेजु मन्दीरमा नित्य र विशेष पुजाको लागि प्रज्ञेशराज राजोपाध्याय, नरेन्द्र प्रसाद जोशी, पद्यमलोचन कर्मार्चाय, प्रा.डा.सिद्धिवीर कर्माचार्य, महेश कर्माचार्य, वीरेन्द्रप्रसाद जोशी, ज्ञानेन्द्रवीर कर्माचार्य र मृगेन्द्रराज राजोपाध्याय गरि ८ जना पुजारी हुनुहुन्छ । तीनै पुजारीहरुले आज पूर्वराजा ज्ञानेन्द्रलाई तलेजु भवानीको नित्य पुजाको टीका, माला र प्रसाद दिनुहुने कार्यक्रम रहेको छ ।
तलेजु भवानीमा २० मिनेटदेखि आधा घण्टाको कार्यक्रममा ज्ञानेन्द्रबाट मुलचोक, भैरव चोक र कुमारी चोकको पनि अवलोकन हुने बताईएको छ । उहाँ अपरान्ह २ बजे भक्तपुर आउनुहुने कार्यक्रम तय भएको छ ।
तलेजु भवानीको पुजापछि पूर्वराजा ज्ञानेन्द्र दरवार क्स्वायरबाट पैदल टौमढी गएर टौमढीमा रहेको श्री भैरवनाथको पुजा गर्नुको साथै सिद्धिलक्ष्मीको दर्शन गर्नहुनेछ ।
कुनै नयाँ कामको शुरुवात गर्नुअघि पुर्व श्री ५ ज्ञानेन्द्रबाट भक्तपुरका प्रशिद्ध देवदेवीको पुजा आजा हुन लागेको देखेर राजनैतिक दलका नेताहरुको मुटुमा भने ढ्यांग्रो बज्न थालेको महसुस हुन थालेको छ ।
