मिरपुर (बंगलादेश): विश्वकप क्रिकेटको तयारीमा रहेको न्यूजील्यान्डले दोस्रो एकदिवसीय खेलमा बंगलादेशलाई उसकै घरेलु मैदान मिरपुरमा ८६ रनले पराजित गरेको छ । न्यूजील्यान्डको यस प्रभावशाली जितमा इस सोढी एक्लैको ६ विकेट समावेश थियो ।
टस जितेर पहिले ब्याटिङ रोजेको न्यूजील्यान्डले ४९.२ ओभरमा सबै विकेट गुमाएर २५४ रनको मध्यम स्कोर खडा गरेको थियो । न्यूजील्यान्डका लागि टम ब्लन्डेलले सर्वाधिक ६८ रन बनाएका थिए ।
मिरपुरको सुस्त पिचमा हेन्री निकोल्सले ४९, इस सोढीले ३५, काइले जेमिसन र कोल म्याकोन्चीले संघर्षपूर्ण २०–२० रन बनाएका थिए ।
जितका लागि २५५ रनको लक्ष्य पछ्याएको बंगलादेशी टिम इस सोढीको घातक बलिङसामु निरिह भएको थियो । सोढीले १० ओभरमा ३९ रन दिएर ६ विकेट लिएका थिए । उनी प्लेयर अफ दी म्याच पनि घोषित भए ।
बंगलादेशका लागि तमिम इक्वालले ४४, महमुदुल्लाहले ४९ रन बनाउनु बाहेक अरु सबै खेलाडी सस्तैमा आउट भएका थिए ।
ब्याट्सम्यानहरु तमिम, तन्जिड हसन, सौम्य सर्कार, तोहिद हृदोय, माहेदी हसन, हसन महमुदलाई सोढीले पवेलियन फर्काएका थिए ।
अन्तमा, बंगलादेशको पूरै टिम ४१.१ ओभरमा १६८ रन बनाएर आउट भएको थियो ।
पहिलो एकदिवसीय खेल वर्षाका कारण रद्द भएको थियो । अब तेस्रो तथा अन्तिम खेल मिरपुरमै आगामी मंगलबार हुनेछ । Agency
