भारत भ्रमणमा रहेको अस्ट्रेलियाली क्रिकेट टिम पहिलो एकदिवसीय क्रिकेटमा भारतसँग पाँच विकेटले पराजित भएको छ ।
तीन एकदिवसीय क्रिकेट अन्तर्गत मोहालीमा खेलिएको पहिलो खेलमा अस्ट्रेलियाले प्रस्तुत गरेको २७७ को लक्ष्य भारतले ८ बल बाँकी छँदै ४८.४ ओभरमा पूरा गरेको थियो ।
भारतका लागि फर्ममा रहेका प्रारम्भिक ब्याट्सम्यान शुभमन गिलले सर्वाधिक आक्रामक ७४ रन तथा रुतुराज गायकवाडले ७१ रन बनाएका थिए । त्यसपछि कप्तान के एल राहुलले अविजित ५८, सूर्यकुमार यादवले ५० तथा इसान किशानले १८ रनको योगदान गरेका थिए ।
आगामी विश्वकपको तयारीमा रहेका दुबै टिमका लागि महत्वपूर्ण मानिएको यस शृंखलाको पहिलो खेलमा भारतका स्टार खेलाडीहरु रोहित शर्मा, बिराट कोहली, हार्दिक पान्ड्या लगायतलाई विश्राम दिइएको थियो ।
यसअघि टस हारेर ब्याटिङको निम्तो पाएको अस्ट्रेलियाली टिमले खासै ठूलो स्कोर खडा गर्न सकेको थिएन । अस्ट्रेलियाका लागि डेभिड वार्नरले सर्वाधिक ५२ रन बनाएका थिए भने स्टिभन स्मिथले ४१, मार्नस लाबुसाग्नेले ३९, जोस इङगिसले ४५, क्यामरुन ग्रिनले ३१, प्याट कमिन्सले २१ रनको योगदान गरेका थिए ।
भारतीय बलर मोहम्मद शामीले पाँच विकेट लिएका थिए ।
यी दुई बिचको दोस्रो खेल आइतबार इन्दोरमा हुनेछ भने तेस्रो खेल आगामी बुधबार राजकोटमा हुनेछ ।
