काठमाडौँ । इन्डो–प्यासिफिक सैन्य प्रमुख सम्मेलनमा सहभागी हुन प्रधानसेनापति प्रभुराम शर्मा भारत जाने भएका छन् ।
नयाँ दिल्लीमा आयोजना हुन लागेको तेह्रौँ संस्करणको इन्डो–प्यासिफिक आर्मिज् चिफ कन्फरेन्स (आईपीएसीसी) मा सहभागिताका लागि उनी असोज ७ गते भारत जान लागेका हुन् ।
असोज ८ गतेदेखि १० गतेसम्म सञ्चालन हुनलागेको सम्मेलनकै क्रममा आयोजना हुने ४७ औँ इन्डो-प्यासिफिक आर्मिज मेनेजमेन्ट सेमिनारमा उपरथी योगराज शर्मा र महासेनानी वसन्त बहादुर गौतम सहभागी हुनेछन् । नवौँ सिनियर इनलिस्ट लिडर फोरममा सहभागी हुन सेना प्रमुख सुबेदार रत्न बहादुर थापा मगर पनि भ्रमण दलमा संलग्न रहनेछन् ।
गत भाद्र २३ गतेको मन्त्रिपरिषद्को निर्णय बमोजिम नियमित रूपमा सञ्चालन हुँदै आएको सो सम्मेलनमा प्रधानसेनापति सहभागी हुनलागेको सेनाले स्पष्ट गरेको छ । भारत र संयुक्त राज्य अमेरिकाका सेनाहरूको सह-आयोजनामा सञ्चालन हुने सम्मेलनमा सहभागी भई प्रधानसेनापतिको नेतृत्वको टोली असोज ११ गते स्वदेश फर्कने कार्यक्रम छ ।
