काठमाडौं । काठमाडौँमा आजबाट सुरु भएको साफ यू–१९ च्याम्पियनसिपमा भारतले विजयी सुरुवात गरेको छ । दशरथ रंगशालामा भएको उद्घाटन खेलमा बंगलादेशलाई ३-० गोलको अन्तरले पराजित गर्दै भारतले सुखद् सुरुवात गरेको हो ।
भारतको जितमा गुग्मसार गोयारी, नाओबा पंगमबम र अर्जुन सिंह ओइनामले समान एक एक गोल गरेका हुन् । गुग्मसार गोयारीले पहिलो मिनेट मै गोल गरेर टीमलाई अग्रता दिलाएका थिए । यस्तै, पहिलो हाफको अन्तिम समयमा नाओबा पंगमबमले गोल गर्दै भारतलाई २-० ले अग्रतामा राखे । खेलको ९० औं मिनेटमा कप्तान इशान शिशोदियाको पासमा अर्जुन सिंह ओइनामले तेस्रो गोल गरे ।
यो जितसँगै भारतले समूह बी मा तीन अंक जोड्न सफल भएको छ । समूह बी मा भारत, बंगलादेश र भुटान रहेका छन् ।
आजै हुने प्रतियोगिताको दोस्रो खेलमा घरेलु टोली नेपालले पाकिस्तानको सामना गर्दै छ। खेल साँझ ५:३० बजेबाट सुरु हुनेछ । नेपालको कप्तानी गोलकिपर जियारथ शेखले गर्नेछन् ।
समुह ए मा रहेको नेपाल समूहमा शीर्ष स्थान ओगट्दै सेमिफाइनलमा बलियो दाबेदारी प्रश्तुत गर्न चाहन्छ । समूह ‘ए’ मा नेपालसहित पाकिस्तान र माल्दिभ्स छन् । दुवै समूहबाट शीर्ष दुई टोली सेमिफाइनल प्रवेश गर्नेछन् ।
