युरोपेली च्याम्पियन्स लिग अन्तर्गतको खेलमा जर्मनीको बुन्डेसलिगमा गत सिजनको लिग लिडर क्लब बायर्न म्युनिखले इंग्लिस क्लब म्यानचेष्टर युनाइटेडलाई पराजित गरेको छ । बायर्नको घरेलु मैदान एलिएन्ज एरेनामा भएको रोमाञ्चक खेलमा बायर्नले युनाइटेडलाई ४-३ गोल अन्तरले पराजित गरेको हो ।
मध्यान्तरअघि बायर्नका लरेय सानेले २८औं मिनेटमा गोल गर्दै बायर्नलाई अग्रता दिलाएका थिए । लगत्तै ३२औं मिनेटमा बायर्नकै सर्ज जीनाब्रीले गोल गर्दै मध्यान्तरसम्ममा बायर्नको अग्रता दोब्बर पारेर खेललाई आफ्नो पकडमा ल्याएका थिए ।
खेल एक पक्षीय हुने अनुमानबीच ४९औं मिनेटमा युनाइटेडमा यसै सिजनमा आबद्ध भएका रासमस होलमन्डले गोल गर्दै टिमलाई खेलमा फर्काउने प्रयास गरे ।
तर, लगत्तै ५४औं मिनेटमा यसै सिजन टोटेनह्यामबाट बायर्न पुगेका ह्यारी केनले पेनाल्टीमा गोल गरेपछि बायर्नले ३-१ को अग्रता बनायो ।युनाइटेडका लागि ८८औं मिनेटमा कासेमिरोले गोल गर्दै गोल अन्तर कम पारे ।
त्यसपछि पनि खेलमा उतारचढाव आइरह्यो । अतिरिक्त इन्जुरी टाइममा दुवै टिमले गोल गरे । इन्जुरी टाइमको दोस्रो मिनेटमा बायर्नका माथिस टेलले गोल गर्दै वायर्नलाई ४-२ को अग्रता दिलाए । इन्जुरी टाइमको पाँचौ मिनेटमा युनाइटेडका कासेमिरोले व्यक्तिगत दोस्रो गोल गरे तर युनाइटेडको हार टार्न यो पर्याप्त भएन ।
जितसँगै समूह ए मा बायर्नले ३ अंक जोडेको छ । यो समूहमा चार वटा टिम रहेका छन् । बायर्न र युनाइटेड बाहेक कोपेनहेगन र गालातासरे पनि यही समूहमा छन् । कोपेनहेगन र गालातासारेबीचको खेल बराबरी भएका कारण दुवैले समान एक एक अंक बाँडेका छन् भने युनाइटेडको ० अंक छ ।
यद्यपी समूह चरणका धेरै खेल अझै बाँकी छन् ।
