एजेन्सी । श्रीलंकालाई १० विकेटले हराउँदै भारतले आठौं पटक एसिया कपको उपाधि जितेको छ । पहिले ब्याटिङ गरेको श्रीलंकाको टोली ५० रनमा अलआउट भएको थियो । यो भारत विरुद्धको कुनै पनि टोलीको एकदिवसीय क्रिकेटको सबैभन्दा सानो स्कोर हो । मोहम्मद सिराजले २१ रन दिएर ६ विकेट लिए ।
यो एसिया कप फाइनलमा कुनै पनि खेलाडीको उत्कृष्ट बलिङ फिगर हो । यी र यस्ता रेकर्डहरु उक्त फाइनलमा धेरै बने । जसबारे यहाँ चर्चा गरौँ ।
१.एसिया कपमा भारतीय खेलाडीको उत्कृष्ट बलिङ
मोहम्मद सिराजले ७ ओभरमा २१ रन दिएर ६ विकेट लिए । उनले एक ओभर मेडेन पनि गरे । यो एसिया कपको इतिहासमा कुनै पनि भारतीयको उत्कृष्ट बलिङ हो। उनीअघि अफ स्पिनर अरशद अयुबले सन् १९८८ मा पाकिस्तानविरुद्ध २१ रन दिएर ५ विकेट लिएका थिए । बलर कुलदीप यादवले पनि यही एसिया कपमा पाकिस्तानविरुद्ध २५ रन दिएर ५ विकेट लिएका थिए ।
२. श्रीलंका विरुद्धको उत्कृष्ट बलिङ
श्रीलंकाविरुद्धको उत्कृष्ट बलिङको कीर्तिमान मोहम्मद सिराजले बनाए । उनले पाकिस्तानका वकार युनुसको कीर्तिमान तोडे । वकारले सन् १९९० मा शारजाह मैदानमा २६ रन दिएर ६ विकेट लिएका थिए ।
सिराज श्रीलंकाविरुद्ध ६ विकेट लिने दोस्रो भारतीय बने । यसअघि आशिष नेहराले सन् २००५ मा ५९ रनमा ६ विकेट लिएका थिए । कोलम्बोको मैदानमा भएको इन्डियन आयल कपको फाइनलमा उनले सो प्रदर्शन गरेका थिए ।
३. एशिया कप फाइनलमा दोस्रो उत्कृष्ट बलिङ
मोहम्मद सिराज एसिया कपको फाइनलमा ६ विकेट लिने दोस्रो खेलाडी बनेका छन् । यसअघि श्रीलंकाका अजन्था मेन्डिसले सन् २००८ मा भारतविरुद्ध १३ रनमा ६ विकेट लिएका थिए । सिराजले एकदिवसीय ढाँचामा कुनै पनि प्रतियोगिताको फाइनलमा चौथो उत्कृष्ट बलिङ गरे । यसअघि पाकिस्तानका आकिब जावेदले सन् १९९१ मा भारतविरुद्ध ३७ रनमा ७ विकेट लिएका थिए । उनीपछि अनिल कुम्बलेले १२ रन र अजन्था मेन्डिसले १३ रनमा ६–६ विकेट लिए ।
४. सिराजले १६ बलमा ५ विकेट लिए
मोहम्मद सिराजले इनिङ्समा १६ बलमा ५ विकेट लिए । उनले एकदिवसीय क्रिकेटमा सबैभन्दा कम बलमा ५ विकेट लिने विश्व कीर्तिमानको बराबरी गरेका छन् । यसअघि श्रीलंकाका चामिन्डा वासले पनि बंगलादेशविरुद्ध १६ बलमा ५ विकेट लिएका थिए । वासले सन् २००३ मा यस्तो गरेका थिए ।
५. एक ओभरमा ५ विकेट लिने पहिलो भारतीय
पहिलो इनिङ्सको चौथो ओभरमा मोहम्मद सिराजले ४ रन दिएर ४ विकेट लिए । उनी एकदिवसीय क्रिकेटको एक ओभरमा ४ विकेट लिने पहिलो भारतीय खेलाडी बनेका छन् । अहिलेसम्म विश्वका ३ बलरले मात्र एक ओभरमा ४ विकेट लिन सकेका छन् । सिराज बाहेक पाकिस्तानका मोहम्मद सामीले २००३ मा र इङ्ल्यान्डका आदिल राशिदले २०१९ मा यो काम गरेका थिए ।
६. कुनै पनि फाइनलमा सबैभन्दा कम स्कोर
श्रीलंकाको टोली १५.२ ओभरमा मात्र ५० रन बनाएर भारतविरुद्ध अलआउट भएको थियो । यो स्कोर कुनै पनि प्रतियोगिताको फाइनलको सबैभन्दा सानो स्कोर हो । यसअघि सन् २००० मा त्रिकोणात्मक सिरिजको फाइनलमा श्रीलंकाले भारतलाई ५४ रनमा अलआउट गरेको थियो।
यो टी–२० ढाँचाको फाइनलमा समेत सबैभन्दा सानो स्कोर हो । २०१७ मा, डेजर्ट कप फाइनलमा आयरिश टोली ७१ रनमा अलआउट भएको थियो ।
७. एशिया कप फाइनलमा सबैभन्दा कम स्कोर
एसिया कपको फाइनलमा श्रीलंकाले सबैभन्दा सानो स्कोरको कीर्तिमान पनि बनाएको छ । यसअघि यो कीर्तिमान भारतको नाममा थियो । सन् २००८ मा श्रीलंकाविरुद्ध १७३ रन बनाएर टिम इन्डिया अलआउट भएको थियो । यसअघि सन् १९८८ मा एसिया कपको फाइनलमा श्रीलंकाले सबैभन्दा कम स्कोर बनाएको थियो । जसमा श्रीलंका भारतविरुद्ध १७६ रन बनाएर अलआउट भएको थियो ।
८. एशिया कपमा सबैभन्दा कम स्कोर
श्रीलंकाले एसिया कपमा सबैभन्दा कम स्कोरको नचाहेको कीर्तिमान पनि बनाएको छ । उअघि बंगलादेशको टोली सन् २००० मा पाकिस्तानविरुद्ध ८७ रन बनाएर अलआउट भएको थियो । यस्तै, बंगलादेश नै सन् १९८६ मा पाकिस्तानविरुद्ध ९४ रनमा अलआउट भएको थियो ।
९. भारतविरुद्ध श्रीलंकाको सबैभन्दा कम स्कोर
भारतविरुद्ध पहिलो पटक श्रीलंकाको टोली ५० रनमा अलआउट भएको छ । यसअघि यस वर्षको जनवरीमा पनि श्रीलंकाको भारतविरुद्ध न्यून स्कोर थियो । तिरुवनन्तपुरमको मैदानमा भएको खेलमा श्रीलंका ७३ रनमा अलआउट भएको थियो । ५० रनको स्कोर एकदिवसीय क्रिकेटमा श्रीलंकाको दोस्रो सबैभन्दा कम स्कोर थियो । यसअघि श्रीलंका सन् २०१२ मा दक्षिण अफ्रिकाविरुद्ध ४३ रनमा अलआउट भएको थियो ।
१०. भारतविरुद्ध कुनै पनि टोलीको सबैभन्दा कम स्कोर
एकदिवसीयमा कुनै पनि टोलीको सबैभन्दा सानो स्कोर भारत विरुद्ध बन्यो । श्रीलंका अघि बंगलादेशको टोली २०१४ मा मिरपुर मैदानमा ५८ रन बनाएर अलआउट भएको थियो ।
एकदिवसीय क्रिकेटमा जिम्बावेसँग कुनै पनि टोलीको सबैभन्दा सानो स्कोर छ । सन् २००४ मा जिम्बावे श्रीलंकाविरुद्ध ३५ रन बनाएर अलआउट भएको थियो ।
११. बल बाँकी रहँदा भारतको सबैभन्दा ठूलो जित
लक्ष्य पछ्याउँदै भारतले सबैभन्दा छिटो जित हात पारेको छ । श्रीलंकाले दिएको ५१ रनको लक्ष्य भारतले ६ दशमलव १ ओभरमै पुरा गरेको थियो । टोलीले २६३ बल बाँकी रहँदा जित निकाल्यो । यसअघि सन् २००१ मा भारतले केन्यालाई २३१ बल बाँकी रहँदा पराजित गरेको थियो । जुन खेल भारतले ११.३ ओभरमा जित्यो ।
१२. एकदिवसीय फाइनलमा सबैभन्दा ठूलो जीत
भारतले एकदिवसीय ढाँचामा कुनै पनि प्रतियोगिताको फाइनलमा बल बाँकी रहँदा सबैभन्दा ठूलो जित दर्ता गरेको छ । भारतले २६३ बल बाँकी रहँदै खेल जित्यो । उअघि अस्ट्रेलियाले सन् २००३ को त्रिकोणात्मक सिरिजको फाइनलमा इंग्ल्याण्डलाई २२६ बल बाँकी राखेर पराजित गरेको थियो ।
१३. ओडीआई फाइनलमा भारत दोस्रो पटक १० विकेटले विजयी बन्यो
भारतले दोस्रो पटक कुनै एकदिवसीय प्रतियोगिताको फाइनलमा १० विकेटले जित हात पारेको छ । सन् १९९८ मा जिम्बाब्वेविरुद्धको त्रिकोणात्मक सिरिजको फाइनलमा भारतले कुनै विकेट नगुमाई १९७ रनको लक्ष्य हासिल गरेको थियो । भारतबाहेक अस्ट्रेलियाले सन् २००३ को त्रिकोणात्मक सिरिजको फाइनलमा इंग्ल्याण्डलाई १० विकेटले हराएको थियो ।
१४. भारतले १० औं पटक १० विकेटले जित निकाल्दै विश्व कीर्तिमान बराबरी गर्यो
एसिया कपमा भारत दोस्रो पटक १० विकेटले विजयी भएको छ । यसअघि भारतले नेपाललाई १० विकेटले पराजित गरेको थियो । टोलीले समग्रमा १० औं पटक एकदिवसीय क्रिकेटमा १० विकेटले जित हासिल गरेको छ । भारतले वेस्ट इन्डिजको विश्व कीर्तिमान बराबरी गरेको छ । वेस्ट इन्डिजले पनि १० एकदिवसीय खेल १० विकेटले जितेको छ ।
१५. बलको हिसाबले सबैभन्दा छोटो एकदिवसीय फाइनल
बलिङको हिसाबले भारत र श्रीलंकाबीचको सबैभन्दा छोटो एकदिवसीय फाइनल भएको छ । एसिया कपको फाइनलमा १२९ बल मात्र खेलिएको थियो । भारतले ३७ बल र श्रीलंकाले ९२ बल खेलेको थियो ।
छोटो ओडीआई अनुसार यो खेल तेस्रो स्थानमा रह्यो । नेपाल र अमेरिकाबीच २०२० मा भएको एकदिवसीय खेल १०४ बलमा सकिएको थियो । श्रीलंका र जिम्बावेबीचको सन् २००१ को ओडीआई खेल मात्र १२० बलमा सम्पन्न भएको थियो ।
