काडमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीले लिने तत्कालीन नीतिका पछाडि दीर्घकालीन रणनीति हुने बताउनुभएको छ । पार्टीको यस्तै नीति नबुझ्दा विगतमा माओवादी पार्टी फुटेको र अहिले बुझ्न थालेपछि विस्तारै पार्टीमा फर्किन थालेको उहाँले बताउनुभयो ।
नेत्रविक्रम चन्द विप्लव नेतृत्व नेकपाको जुम्ला जिल्ला समितिलाई आज माओवादीमा प्रवेश गराउँदै उहाँले क्रान्ति गरिन्छ भन्दै माओवादी छाडेकाहरु अहिले मूल पार्टीमै फर्किन थालेको बताउनुभयो । उहाँले अन्य साथीहरुलाई पनि पार्टीमा फर्कन आह्वान गर्नुभयो ।
विगतमा पार्टीले बनाएको नीतिप्रति भ्रम सिर्जना भएर पार्टी छोड्नेहरु अहिले पार्टीको दीर्घकालीन रणनीति बुझेर मूल पार्टीमा फर्किन थालेको उहाँको भनाइ थियो ।
विप्लव नेतृत्वको जुम्ला जिल्ला इन्चार्ज चन्द्रबहादुर तिरुवा ‘रविकिरण’ लगायतका जिल्ला कमिटीका सदस्यहरु माओवादी केन्द्रमा प्रवेश गरेका हुन् ।
