एजेन्सी । बीआर चोपडाको चर्चित टिभी सिरियल महाभारतमा ‘भीम’को भूमिका निभाएका प्रवीण कुमार सोबतीको निधन भएको छ ।
भारतीय सञ्चारमाध्यमका अनुसार उनको ७४ वर्षको उमेरमा मंगलबार निधन भएको हो ।
महाभारत धारवाहिकबाहेक उनले अन्य थुप्रै धारावाहिक र बलिउड फिल्ममा पनि अभिनय गरेका थिए । फिल्ममा काम गर्नु अघि प्रविण एक खेलाडीसमेत थिए ।
उनले एसियाली र कमनवेल्थ गेम्समा देशका लागि धेरै स्वर्ण र रजत पदक जितेका थिए।
खेलकुदमा गरेको योगदानका लागि उनलाई सन् १९६७ मा अर्जुन पुरस्कार प्रदान गरिएको थियो ।
प्रवीणले १९८१ मा आएको फिल्म ‘रक्षा’बाट कलाकारितामा डेब्यु गरेका थिए । तर, उनको पहिचान भने महाभारतको ‘भीम’बाटै मिलेको थियो । उनको अन्तिम फिल्म १९८८ को ‘ट्रेन टू पाकिस्तान’ थियो ।
