काठमाडौँ । एसिया कपमा सहभागिता जनाएर नेपाली क्रिकेट टोली स्वदेश फर्किएको छ । पहिलोपटक प्रतियोगितामा सहभागिता जनाएका नेपाली खेलाडीहरु विश्व क्रिकेटका महारथि देशहरूसँग खेल जित्न नसके पनि प्रशंसा र क्रिकेट प्रेमिमाझ नाम चिनाएर आएका छन् ।
खेलाडीलाई स्वागत गर्न क्यानका पदाधिकारी र क्रिकेट समर्थकहरू बजागाजासहित त्रिभुवन अन्तर्राष्ट्रिय विमानस्थल पुगेका थिए । उनीहरुलाई दोसल्ला र माला लगाएर भव्य स्वागत गरिएको थियो ।
प्रतियोगितामा नेपालले पहिलो खेल विश्व क्रिकेटको नम्बर वान टोली पाकिस्तानसँग मुल्तानमा खेलेको थियो । नेपाल उक्त खेलमा २ सय ३८ रनले पराजित भएको थियो । त्यसपछि नेपाल दोस्रो खेल खेल्न श्रीलङ्का गएको थियो ।
श्रीलङ्काको क्यान्डीमा भएको भारतसँगको खेलमा नेपालले आफ्नो उत्कृष्ट ब्याटिङ ताकत देखाएको थियो । जसमा नेपालले भारतलाई २३१ रनको चुनौतीपूर्ण लक्ष्य दिएको थियो । पछि बर्षाले अवरोध गर्दा खेललाई २० ओभरमा घटाईएको थियो । जसमा नेपाल डकवर्थ लेविस (डिएलए) पद्धतिको आधारमा १० विकेटले पराजित भएको थियो ।
दुवै खेलमा पराजित भएको नेपाल समूह चरणबाट बाहिरिन पुगेको थियो । प्रतियोगिताबाट बाहिरीएपनि खेलाडीको मनोबल र खेल कौशलको खुबै चर्चा भएको थियो ।
फोटो -राष्ट्रिय खेलकुद परिषद्
