विराटनगर । कोशी प्रदेश सरकारविरुद्ध नेकपा एमाले फेरि अदालत जाने भएको छ ।
प्रदेशका मुख्यमन्त्री उद्धव थापाले संविधानको हुर्मत लिएर विश्वासको मत लिएको भन्दै नेकपा एमाले बदरको मागसहित सर्वोच्च अदालत जाने भएको हो ।
प्रदेश नियमावली र संविधानका धारालाई छलेर थापाले जबर्जस्ती विश्वासको मत पाएको घोषणा गरिएको भन्दै अदालत जाने तयारी भएको एमाले कोशी प्रदेश संसदीय दलका नेता हिक्मत कार्कीले बताउनुभयो ।
संसदीय दलले समेत रिट दायर गर्ने निर्णय गरेको उहाँले जानकारी दिनुभयो । भोलि नै रिट दर्ता गराउने एमालेको तयारी रहेको उहाँले बताउनुभयो ।
प्रेस चौतारी नेपाल कोशी प्रदेश कमिटीको प्रथम साधारणसभामा बोल्दै नेता कार्कीले एमालेसँग अब अर्को विकल्प नभएको बताए ।
“प्रदेश नियमावली र संविधानका धारा छलेर जाने ठाउँ छैन, त्यसविरुद्ध हामी कोर्ट जान्छौँ, हामीसँग अर्को विकल्प छैन”, उहाँले भन्नुभयो ।
सत्ता गठबन्धनबाट मुख्यमन्त्री बनेका उद्धव थापाले सभाध्यक्षलाई प्रयोग गर्दै हिजो विश्वासको मत लिनुभएको थियो ।
