काठमाडौ । प्रधानमन्त्री केपी शर्मा ओली प्रतिनिधिसभाबाट विश्वासको मत प्राप्त गर्न असफल भएका छन् । प्रधानमन्त्रीले वर्तमान प्रतिनिधिसभाबाट विश्वासको मत पाउँ भनी संसदमा प्रस्ताव दर्ता गराएकामा आज त्यस प्रस्तावको पक्ष र विपक्षमा मतदान भएको थियो ।
उक्त प्रस्तावमा भएको मतदानमा प्रधानमन्त्रीले विश्वासको मत प्राप्त गर्न असफल भएका हुन् ।
प्रधानमन्त्रीप्रति विश्वास छ भनी मतदान गर्ने सांसदको संख्या ९३ र विपक्षमा अर्थात वर्तमान प्रधानमन्त्रीप्रति विश्वास छैन भनी मतदान गर्ने सांसदको संख्या १२४रहेको छ । यसै गरी १५ सांसद तटस्थ बसे भने ३९ सांसद अनुपस्थित रहे ।
आजको यस मतदान प्रक्रियाको रमाइलो पक्ष चाहिँ के थियो भने प्रधानमन्त्री ओलीकै दलका असन्तुष्ट समूहका रुपमा रहेका माधव नेपाल र झलनाथ खनाल समूहका सांसदहरुले भने आफ्नै पार्टी अध्यक्ष ओलीलाई मत दिएनन् ।
यद्यपि, नेकपा एमालेले ह्वीप नै जारी गरेर प्रधानमन्त्रीको विश्वको मतको पक्षमा मतदान गर्न भनेको थियो । ह्वीपका बाबजुद पनि उनहिरु अनुपस्थित भएका हुन् ।
संसदमा आज भएको मतदानपछि सभामुख अग्नि सापकोटाले सो परिणाम सुनाएका हुन् ।
आजका लागि आह्वान गरिएको संसदको बैठकमा नेपाली काँग्रेस र नेकपा माओवादी केन्द्रले प्रधानमन्त्रीको विपक्षमा मतदान गर्ने निर्णय नै गरेका थिए ।
तर उता वर्तमान सत्ताको साँचो हातमा रहेको भनिएको मधेश केन्द्रित दल जसपाले भने पक्ष या विपक्षमा मतदान गर्न आफ्ना सांसदहरुलाई स्वतन्त्र छोडिदिएको थियो ।
उता नेकपा एमालेकै असन्तुष्ट समूह माधव नेपाल र झलनाथ खनालले भने आफ्ना सांसदहरुलाई संसदमै उपस्थित नहुन आह्वान गरेबमोजिम उनीहरु उपस्थित भएनन् ।
प्रधानमन्त्रीले संसदबाट विश्वासको मत दिन नसकेपछि अब सरकार गठनको प्रक्रिया नयाँ मोडमा प्रवेश गरेको छ ।
