काठमाडौं । सहिद स्मारक 'ए' डिभिजन लिग फुटबल अन्तर्गत विभागीय टोली नेपाल पुलिस क्लबले जित निकालेको छ ।
बुधबार दिउँसो भएको खेलमा पुलिसले च्यासल युथ क्लबलाई २–१ गोलले पराजित गरेको हो ।
त्रिपुरेश्वरस्थित दशरथ रंगशालामा भएको खेलमा पुलिसलाई जित दिलाउन रबि शंकर पासवानले दुई गोल गरे ।
खेलको ३७ औं मिनेटमा पासवानले गोल गर्दै पुलिसलाई सुरुवाती अग्रता दिलाएका थिए ।
नीर कुमार राईले उनलाई बल उपलब्ध गराएका थिए । यता, मौसा अबागानाले खेलको ५२ औं मिनेटमा पेनाल्टीमा गोल गर्दै च्यासललाई १–१ गोलको बराबरी स्थितीमा ल्याए ।
पुलिसका कप्तान सुमन सुवेदीले ५१ औं मिनेटमा रुमेश बर्तौलालाई पेनाल्टी क्षेत्रभित्र लडाएपछि च्यासलले पेनाल्टी जितेको थियो ।
खेलको ७० औं मिनेटमा पासवानले व्यक्तिगत तथा टिमका लागि दोस्रो गोल गर्दै पुलिसलाई २–१ को जित दिलाए ।
सुमन लामाले उपलब्ध गराएको बलमा पासवानले गोल गरेका हुन् ।
जितसँगै ९ खेलमा १० अंक जोडेको पुलिस लिगको दशौँ स्थानमा उक्लिएको छ ।
यता, च्यासल ९ खेलमा ५ अंक जोडेर १३ औं स्थानमा रहेको छ ।
खेलमा पुलिसका रबि पासवान प्लेयर अफ दि म्याच चुनिँदा च्यासलका आशिष राई इमर्जिङ प्लेयर घोषित भए ।
