एजेन्सी । टि२० आईको पहिलो खेलमा टेस्ट टोली न्युजिल्यान्डसँग युएई १९ रनले पराजित भएको छ । यससँगै युएईको घरेलु मैदानमा भएको तीन खेलको टि२० आईमा न्युजिल्यान्डले १-० ले अग्रता लिएको छ ।
जितको लागि न्युजिल्यान्डले दिएको १ सय ५६ रनको लक्ष्य पछ्याएको युएई १९.३ ओभरमा १ सय ३६ रन बनाउदै अल आउट भयो । युएईको लागि डेब्यू गरेका युवा ब्याटर अर्यांश शर्माले अर्धशतकिय ईनिङ खेले । उनले ४३ बलमा ९ चौका र १ छक्कासहित सर्वाधिक ६० रन बनाए ।
युएईका ओपनर मोहम्मद वासिम डक आउट भए भने वृत्य अरविन्द्य र आसिफ खान १३/१३ रनमा आउट भए । अंश टन्डन १२, बासिल हामिद ५, अली नासिर १६ र आयन खान ५ रनमा आउट भए ।
न्युजिल्यान्डको जितमा टिम साउथीले सर्वाधिक ५ विकेट लिए । मिचेल सान्टनार र जेम्श निसमले दुई विकेट लिए भने कायल जेमिसनले एक विकेट लिए ।
त्यसअघि दुबई इन्टरनेशल क्रिकेट मैदानमा टस हारेर पहिला ब्याटिङ गरेको न्युजिल्यान्डले निर्धारित २० ओभरमा ६ विकेटको क्षतिमा १ सय ५५ रन बनाएको थियो ।
न्युजिल्यान्डको लागि ओपनर टिम सिफर्टले सर्वाधिक ५५ रनको योगदान दिएका थिए । ओपनर चाद बोवेस शून्य रनमा क्याच आउट भएका थिए भने विकेटकिपर डेन क्लेभरलाई ४ रनमा आउट भए ।
यस्तै, मिचेल सान्टनार २ रनमै बोल्ड हुँदा मार्क च्यापम्यान १५ र जेम्श निशम २५ रनमा आउट भए ।
युएईको लागि जुनैद सिद्दिक र बासिल हामिदले बराबरी दुई विकेट लिए । जहुर खान र मोहम्मद फराजुदीनले समान एक विकेट लिए ।
अब दोस्रो खेल शनिबार र तेस्रो खेल आइतबार हुनेछ ।
