काठमाडौं । नेकपा माओबादी केन्द्रले द्वन्दकालिन मुद्दालाई उचालेर सभामुख अग्नि सापकोटामाथि आक्रमण गर्नु प्रतिक्रियावादी षड्यन्त्रको गम्भीर अभिव्यक्ति भएको जनाएको छ । माओवादी केन्द्रका अध्यक्ष पुष्पकमल दाहाल प्रचण्डका स्वकीय सचिव रमेश मल्लले सामाजिक सञ्जाल मार्फत सभामुख माथीको आक्रमणको जमेर प्रतिबाद गर्न आब्हान गर्नुभएको छ ।
उहाँले सामाजिक सञ्जलमा लेख्नु भएको छ :
जनयुद्ध, जन-आन्दोलन, बिस्तृत शान्ति सम्झौता, संविधानसभा, संघीय लोकतान्त्रिक गणतन्त्र हुदै नयाँ संविधानमार्फत संस्थागत हुदै गरेको नेपालको राजनैतिक परिवर्तनलाई ध्वस्त पार्न सुरु देखि नै एकथरी शक्तिहरु सकृय रहदै आएका थिए र छन।
जनप्रतिनिधिमुलक संस्थामाथी प्रहार गरेर जन्मिएको प्रतिगमनलाई परास्त गरि आज मुलुक पुनस् निर्वाचनको प्रक्रिया हुदै शान्ति र संविधानलाई नयाँ उचाईमा कृयाशिल गर्न सक्रिय रहेको बेला सत्य निरुपण तथा मेलमिलाप आयोगको क्षेत्राधिकार भित्रका द्वन्दकालिन मुद्दालाई उचालेर सम्माननिय सभामुखमाथि आक्रमण गर्नु प्रतिक्रियावादी षड्यन्त्रको गम्भीर अभिव्यक्ति हो।
यो कार्य शान्ति, संविधान र समृद्धिको नेपाली मौलिक बाटोलाई ध्वँस गर्ने, परिवर्तनको मार्गबाट देशलाई विचलित गराउने र मुलुकलाई बहुआयामिक द्वन्द्वतिर धकेल्ने उद्देश्यद्वारा प्रेरित छ।
यो विषय सामान्य छैन। यो राष्ट्रिय सिमाबाट मात्र निर्देशित पनि छैन। यसले लोकतान्त्रिक गणतन्त्रका पक्षधर शक्तिलाई बिभाजित गर्ने, क्रान्तिकारी जनसमुदायलाई अलगावमा पार्ने र देशलाई परिवर्तनको मार्गबाट पछाडी धकेल्न चाहन्छ। यसबाट उत्पन्न हुने दुरगामी परिणामको आकलन गरि नियोजित रूपमा खडा गरिएका षड्यन्त्रका तानाबानाको अझ बढी एकतावद्द भै जमेर प्रतिवाद गरौं।
मंगलबार १४ जना नागरिक अभियन्ताहरुले सभामुख सापकोटालाई महाअभियोग लगाएर हटाउन माग गरेका थिए ।
