काठमाडौँ । प्रमुख प्रतिपक्षी दल नेकपा (एमाले) का सांसदहरुले अवरुद्ध गरेपछि प्रतिनिधिसभाको बैठक स्थगित भएको छ ।
शुक्रबार बसेको बैठकमा एमाले सांसदहरुले अवरोध गरेपछि सभामुख देवराज घिमिरेले बैठक स्थगित गरेका हुन् ।
बैठक सुरु हुने वित्तिकै एमाले सांसदहरुले उठेर अवरोध गरेका थिए । त्यसपछि सभामुख घिमिरेले एमालेकी सांसद ज्वाला कुमारी साहलाई बोल्न समय दिए ।
त्यसको लगत्तै सत्तारुढ दलका सांसदहरुले विपक्षीको कुरा सुनेर मात्रै सदन अगाडि बढ्न नसक्ने भन्दै उठेर विरोध जनाएपछि सभामुखले सभा आफ्नो नियन्त्रणमा चल्ने बताए ।
एमाले सांसदहरुले सुन तस्करीका विषयमा उच्चस्तरीय छानबिन समिति गठन माग गर्दै नारावाजी गरेपछि सभामुख घिमिरेले कार्यसूचीमा भएका सबै विषय हटाएर बैठक स्थगित भएको घोषणा गरे । अर्को बैठक यही साउन २९ गते दिउँसो १ बजेका लागि बोलाइएको छ ।
