काठमाडौँ । नक्कली शैक्षिक प्रमाणपत्र प्रकरणमा थप एक जना चिकित्सक पक्राउ परेका छन् ।
केन्द्रीय अनुसन्धान ब्युरो सिआइबीले काठमाडौंबाट सुमेरू सिटी हस्पिटलकी डा.पुनम थापा चौधरीलाई पक्राउ गरेको सिआइबीका एसपी नवराज अधिकारीले जानकारी दिए।
उनलाई काठमाडौंस्थित घरबाट पक्राउ गरिएको हो। यससँगै यस प्रकरणमा पक्राउ पर्नेको संख्या ८ पुगेको छ।
सिआइबीले शुक्रबार बिहान मनिष चौधरी र इशान अस्पतालमा कार्यरत डाक्टर श्रद्धा शिल्पकारलाई पनि पक्राउ गरेको थियो । यस्तै, बिहीबार यस अपरेशनमा सांसद सुनीलकुमार शर्मासहित ५ जना चिकित्सकलाई पक्राउ गरेको थियो ।
सिआइबीले फक्सट्रट चार्ली अपरेशन देशभरि चलाएर नक्कली शैक्षिक प्रमाणपत्र लिने चिकित्सकहरूलाई पक्राउ गरिरहेको हो।ब्युरोको अहिलेको अपरेशनमा काठमाडौँ उपत्यका र उपत्यका बाहिर गरि १५ जना चिकित्सक निशानामा रहेका बताईएको छ ।
