काठमाडौँ ।नेपाल विद्युत प्राधिकरणका प्रबन्ध निर्देशक कुलमान घिसिङले दुई वर्षभित्र मुलुकमा पूर्ण विद्युतीकरण हुने बताएका छन् ।
बिहीबार आयोजित पत्रकार सम्मेलनमा बोल्दै घिसिङले सरकारको लक्ष्यअनुसार नेपाल आगामि दुई बर्षमा पूर्ण विद्युतीकरण हुने बताएका हुन् ।
उनले भने, ‘सरकारको लक्ष्यअनुसार आगामी २ वर्षभित्र पूर्ण विद्युतीकरणका सबै योजना अघि बढेका छन्। यस्तै, प्रतिव्यक्ति विद्युत खपत २ वर्षअघि २३५ युनिट प्रतिव्यक्ति थियो । जुन, यतिबेला बढेर २८० युनिट प्रतिव्यक्ति पुगेको छ ।
प्राधिकरणले विगत २ वर्षमा उद्योगले मागेजति बिजुली उपलब्ध गराएको निर्देशक घिसिङले जानकारी दिए । साथै, उनले देशको कूल जनसंख्याको ९५ प्रतिशत जनता विद्युतको पहुँचमा पुगेको जानकारी दिएका छन् । जसमा मधेस प्रदेश, बागमती प्रदेश र गण्डकी प्रदेश पूर्णरुपमा विद्युतीकरण भएको उनले बताए ।
निर्देशक घिसिङको अनुसार कोसीमा ९५ प्रतिशत र लुम्बिनीमा ९८ प्रतिशत जनसंख्या विद्युतको पहुँचमा पुगेको छ । यस्तै, कर्णाली प्रदेशको ६७ प्रतिशत र सुदूरपश्चिम प्रदेशको ८२ प्रतिशत जनसंख्या विद्युतको पूर्ण पहुँचमा पुगेको छ ।
