काठमाडौं । सुपरस्टार रजनीकान्तको बहुप्रतीक्षित फिल्म ‘जेलर’ आजबाट प्रदर्शनमा आएको छ । भारतलगायत विश्वव्यापी रुपमा रिलिज भएको साउथ ईन्डिन फिल्म ‘जेलर’ नेपालमा पनि बिहीबारबाटै प्रदर्शनमा आएको छ ।
यस फिल्मको अवसरमा चेन्नई र बैंगलोरका अधिकांश कार्यालयहरूले आफ्ना कर्मचारीहरूलाई बिदा समेत दिएको छ । यति मात्र होइन, धेरै कार्यालयमा कर्मचारीलाई टिकट समेत निस्शुल्क दिएका छन् ।
दक्षिण भारतमा रजनीकान्तको यतिसम्म क्रेज छ कि फ्यानहरु थलाइवाका फिल्म ‘फस्ट दिन फस्ट शो’ हेर्न चाहन्छन् ।
रजनीकान्तले २ वर्षपछि पर्दामा धमाकादार एन्ट्री गरेका हुन् । फिल्म जेलरमा उनी फुल एक्सन मोडमा देखिएका छन् । ट्रेलरले रजनीकान्तलाई पहिले कहिल्यै नदेखेको अवतारमा देखाइएको छ र एक्शन-प्याक र सस्पेन्सफुल कथालाई संकेत गरेको छ।
थलाइवाको एक्सन प्याक ‘जेलर’लाई नेल्सन दिलीपकुमारले निर्देशन गरेका हुन् । फिल्ममा मोहनलाल, ज्याकी श्राफ, तमन्ना भाटिया र शिवराज कुमारको पनि भूमिका रहेको छ ।
भोलि शुक्रबार पनि बलिउडका दुई ठूला फिल्म ‘गदर २’ र ‘ओ माइ गड २’ रिलिज हुँदैछन् ।
