काठमाडौँ । सोमबार रातिदेखि परेको अविरल वर्षाका कारण काठमाडौं उपत्यकामा आएको बाढी र पहिरोमा फसेका १७ जनाको उद्धार गरिएको छ ।
काठमाडौं उपत्यकाका एसएसपी दिनेशराज मैनालीको अनुसार उपत्यकाभित्र विभिन्न ठाउँमा बाढी तथा पहिरोमा फसेका १७ जनाको उद्धार गरिएको हो ।
अविरल वर्षाका कारण उपत्यकाका विभिन्न ठाउँमा बाढी पस्नुको साथै केहि स्थानमा पहिरोले संरचनाहरूमा समेत क्षति पुर्याएको छ । कागेश्वरी मनोहरा नगरपालिका-७ मा पहिरोले टहरा भत्किँदा १६ वर्षीया किशोरी घाइते भएकी छन् । उनको उद्धार गरी केएमसी अस्पतालमा लगिएको एसएसपी मैनालीले जानकारी दिए ।
त्यस्तै बागमती किनारको सुन्दरीघाट सुकुम्बासी बस्तीबाट ११ जना र त्रिपुरेश्वरस्थित टहरामा बसेका दुई जनाको उद्धार भएको छ ।
ललितपुरको सानेपास्थित कालोपुलमुनि जेसिबी डुबानमा पर्दा चालकको उद्धार गरिएको एसएसपी मैनालीले बताए । यस्तै, भक्तपुरको हनुमन्ते खोला राममन्दिर नजिकै पानीमा फसेका तीन जना, मूलपानीमाअलपत्र परेका दुई जनाको उद्धार गरिएको छ ।
