काठमाडौँ । पूर्वराष्ट्रपति विद्यादेवी भण्डारीले आफ्नो आधिकारिक ट्विटर ह्यान्डल @BidyaDevi2018 प्रयोग गर्न सुरु गर्नुभएको छ ।
यसअघि उहाँले राष्ट्रपतिको कार्यकालमा सम्बन्धित सूचनाहरू प्रवाह गर्न शीतल निवास @SHITALNIWAS नामबाट ट्विटर अकाउन्ट सञ्चालनमा ल्याउनुभएको थियो। भेरिफाइड भइसकेको उक्त अकाउन्ट डिएक्टिभेट भएपछि उहाँले केही महिनायता ट्विटर प्रयोग गर्नुभएको थिएन ।
भण्डारीले केही दिन अघिदेखि आफ्नो नयाँ ट्विटर अकाउन्ट @BidyaDevi2018 बाट सूचना दिनुभए पनि उक्त अकाउन्ट भेरिफाइड नभएकाले कस्को भन्ने दुविधा बाँकी नै थियो ।
नयाँ सञ्चालनमा आएको ट्विटर अकाउन्ट पूर्वराष्ट्रपति भण्डारीकै भएको र उक्त अकाउन्ट भर्खरै भेरिफाइड भएर नीलो रङ प्राप्त भएको पूर्वराष्ट्रपतिको सचिवालयले बताएको छ । सचिवालयले पूर्वराष्ट्रपति सम्बन्धी सूचना, जानकारी वा उहाँका धारणा बुझ्न अहिले सञ्चालनमा आएको अकाउन्ट फलो गर्न अनुरोध गरेको छ