काठमाडौँ । नेपालले आगमी अगष्ट रसेप्टेम्बरमा पाकिस्तान र श्रीलंकामा हुनलागेको एकदिवसीय एसिया कप २०२३ खेल्दैछ । नेपालले गत वैशाखमा घरेलु मैदानमा भएको एसिसी प्रिमियर कपको उपाधि जित्दै एसिया कपमा स्थान बनाएको थियो ।
एसिया कपमा डेब्यू गर्ने नेपाल आठौं टोली बन्ने भएको छ । भारत, श्रीलंका, पाकिस्तान, बंगलादेश, अफगानिस्तान, हङकङ र युएईपछि एसिया कप खेल्ने नेपाल आठौं टोली बनेको हो। एसोसिएट टोलीमा भने नेपाल हङकङ र युएईपछिको तेस्रो टोली बन्नेछ ।
एसियन क्रिकेट काउन्सिल एसिसीले विश्वकप अघि तयारीको लागि एसिया कप आयोजना गर्दछ । एकदिवसीय विश्वकप आगमी अक्टोबर नोभेम्बरमा भारतमा हुँदैछ ।
एसिसीले विश्वका पावर हाउससँग एक एसोसिएट टोलीलाई खेल्ने अवसर दिन्छ । युएईले २००४, २००८ र २०१६ मा एसिया कप खेलेको थियो ।हङकङले पनि २००४, २००८, २०१८ र २०२२ मा एसिया कप खेलेको थियो ।
एसिया कपको उपाधि हालसम्म भारत, पाकिस्तान र श्रीलंकाले जितेका छन् । भारतले ७ पटक एसिया कपको उपाधि जित्दा श्रीलंकाले ६ र पाकिस्तानले दुईपटक उपाधि जितेको छ ।
नेपालले पहिलो खेल पाकिस्तानसँग अगष्ट ३० (भदौं १३) मा खेल्नेछ । पाकिस्तानको मुल्तानमा उक्त खेलपछि नेपाल श्रीलंका जानुपर्ने हुन्छ । नेपाल र भारतबीचको खेल भने श्रीलंकाको काड्नीमा सेप्टेम्बर ४ (भदौं १८) मा हुनेछ ।
समूह ए मा नेपाल, भारत र पाकिस्तान छन् भने समूह बी मा बंगलादेश, श्रीलंका र अफगानिस्तान छन् ।
