काठमाडौँ । संगठन विस्तारका लागि राष्ट्रिय प्रजातन्त्र पार्टी (राप्रपा) ले केन्द्रदेखि जिल्ला तहका नौ सय नेतालाई स्थानीयस्तरमा खटाउने भएको छ ।
देशका ७५३ स्थानीय तह र ६ हजार ६४३ वडा तथा प्रवासमा समेत राप्रपाले नेताहरू तोकेर जिम्मेवारी प्रदान गरेको छ । पार्टी अध्यक्ष राजेन्द्र लिङ्देनले समेत भूगोलको जिम्मेबार लिनुभएको छ ।
तर राप्रपाका तीन वरिष्ठ नेता लोकेन्द्रबहादुर चन्द, डा प्रकाशचन्द्र लोहनी र पशुपति शमशेर राणालाई भूगोल केन्द्रित जिम्मेवारी दिइएको छैन ।
पार्टी अध्यक्ष लिङ्देनले धरान उपमहानगरपालिकाको जिम्मेवारी लिनुभएको छ । वरिष्ठ उपाध्यक्ष रवीन्द्र मिश्रले आफैँले संसदीय निर्वाचन लडेको क्षेत्र काठमाडौँ–१ पाउनुभएको छ ।
त्यसैगर डा धवलशम्शेर राणाले नेपालगञ्ज, उद्धव पौडेलले विराटनगर, विक्रम पाण्डेले भरतपुर, प्रवक्ता मोहन श्रेष्ठले गोरखा (भीमसेन, सहिद र लखन), ज्ञानेन्द्र शाहीले जुम्ला (तातोपानी, चन्दननाथ), रेखा थापाले सुन्दर हरैचा बेलबारीको जिम्मेवारी पाउनुभएको छ ।
राप्रपाका अनुसार जिम्मेवारी प्राप्त गर्ने नेताहरूले आफूलाई तोकिएको भूगोलमा ६ महिनासम्म संगठन विस्तार र सुदृढीकरणका काम गर्नुपर्ने छ ।
उनीहरूले गरेको कामको अनुगमन तथा मूल्यांकन पार्टीका प्रदेश संयोजक र सह–संयोजकहरुले गर्नेछन् ।
यही क्रममा राप्रपाले राजसंस्था, हिन्दू राष्ट्र र संघीयतासम्बन्धी पार्टीको अवधारणालाई जनताको घरदैलोमै पुर्याउने लक्ष्य लिएको छ ।
पार्टी प्रवक्ता मोहन श्रेष्ठका अनुसार जिम्मेवारी तोकिएका नेताहरूले भ्रष्टाचार र भ्रष्टाचारविरुद्ध पार्टीका अवधारणाहरूलाई प्राथमिकताका साथ राख्ने तथा नयाँ पुस्तालाई पार्टीमा जोड्ने विशेष अभियान सञ्चालन गर्ने काम गर्नेछन् । उहाँले तोकिएको भूगोलको जिम्मेवारीमा नजाने नेताहरू स्वत: पदीय जिम्मेवारीबाट मुक्त हुने बताउनुभयो ।
भूगोल केन्द्रित जिम्मेवारीमा रहेका नेताहरूले आफ्नो दैनिक क्रियाकलाप विद्युतीय माध्यमबाट सचिवालयमा नियमित पेश गर्नुपर्ने छ । प्रवक्ता श्रेष्ठले ६ महिनापछि भूगोलको जिम्मेवारी हेरफेर हुन सक्ने बताउनुभयो ।
हेर्नुहोस् सूची:
[pdf-embedder url=”https://newspolar.com/wp-content/uploads/2023/07/raprapa.pdf”]
