किभ/मस्को । युक्रेनलाई घेरा हालेको रुसले अब परमाणु बम खसाल्ने अभ्यास गर्न लागेको छ । यस अभ्यासमा रुसी सेनाले समुद्र, जमिन र आकाशबाट परमाणु बम खसाल्ने अभ्यास गर्नेछ। बेलायतका रक्षामन्त्री बेन वालेसले बिहीबार यस्तो जानकारी दिएका हुन् ।
उनले रुसी सेनाले आणविक रणनीतिक अभ्यास गर्न लागेको बताए । युक्रेन सङ्कटको कूटनीतिक समाधान खोज्ने निरन्तर प्रयासका बाबजुद रुस गलत दिशामा अघि बढिरहेको वालेसले बताए ।
रुसले युक्रेनमा आक्रमण गर्ने तयारी गरिरहेको जासुसी सूचना प्राप्त भएको वालेसले बताए। उनले वार्तापछि पनि कुरा गलत दिशामा गइरहेको बताए ।
बेलायती रक्षामन्त्रीले भने, “रुसीहरूले अझै पनि आफ्नो सेना बढाइरहेका छन् । उनीहरु अब आणविक रणनीतिक अभ्यास गर्न लागेका छन् । वास्तवमा हामीले अन्यत्र धेरै गतिविधि देखिरहेका छौँ।”
यसअघि रुसी रक्षा स्रोतले तास समाचार एजेन्सीसँगको कुराकानीमा आणविक अभ्यास ‘थन्डर’मा रुसको रणनीतिक आणविक बलका तीनवटै भागले जमिन, समुद्र र आकाशबाट परमाणु बम खसाल्ने अभ्यास गर्ने बताएको थियो।
रूस र बेलारुसद्वारा संयुक्त सैन्य अभ्यास सुरु
रुसले प्रायः आणविक अभ्यास गर्छ तर युक्रेनसँगको तनावका बीच यस्तो अभ्यास गर्ने निर्णयले विश्वभरका देशहरूको तनाव बढाउन सक्छ।
रुसले यस्तो बेलामा यो आणविक अभ्यास गरिरहेको छ जतिबेला उसले युक्रेनको सीमा नजिक बेलारुससँग व्यापक सैन्य अभ्यास सुरु गरेको छ । यो अभ्यासमा करिब ३० हजार सैनिक सहभागी छन् ।
अर्कोतर्फ नेटोका महासचिवले रुसी अभ्यासलाई ‘खतरनाक क्षण’ भनेका छन् । नेटोका महासचिवले बेलारुसमा रुसको तैनाथी हेरिरहेको भन्दै यो शीतयुद्धपछिको सबैभन्दा ठूलो अभ्यास भएको बताए।
“यो युरोपको सुरक्षाका लागि खतरनाक क्षण हो”, उनले भने, “रुसी सेनाको सङ्ख्या बढ्दै गएको छ । आक्रमणको खतराको चेतावनी समय छोटो हुँदै गइरहेको छ।”
रुसी राष्ट्रपति भ्लादिमिर पुटिनले यो सैन्य तैनाथीमार्फत युक्रेनमा मनोवैज्ञानिक दबाब दिइरहेका छन् ।
पश्चिमी मुलुकहरुले मस्कोलाई उपदेश नदेऊ : रुस
युक्रेन सङ्कटलाई कम गर्न र कूटनीतिक मार्ग अपनाउनुपर्नेमा जोड दिन रुस पुगेका बेलायती विदेशमन्त्री लिज ट्रसले बिहीबार आफ्ना रुसी समकक्षी सर्गेई लाभरोभसँग भेटवार्ता गरेका छन्।
लिजले रुसलाई छिमेकी युक्रेनमा आक्रमण गर्दा गम्भीर परिणाम र भारी मूल्य चुकाउनुपर्ने चेतावनी दिएका छन् । उनले रुसलाई युक्रेनको स्वतन्त्रता र सार्वभौमसत्ताको सम्मान गर्ने अन्तर्राष्ट्रिय सम्झौताको प्रतिबद्धता पालना गर्न आग्रह गरे।
बैठकमा कडा अडान लिने लाभरोभले पश्चिमा राष्ट्रहरूसँग मस्कोलाई उपदेश नदिँदा हुने स्पष्ट पारे। लाभरोभले भने, “वैचारिक दृष्टिकोण र अन्तिम चेतावनीको बाटो अगाडि बढ्न सकिँदैन।”
बैठकपछि बेलायती विदेशमन्त्रीले रुसलाई आफ्ना सेना फिर्ता सैन्य अखडामा पठाउन पुनः आग्रह गरे । यद्यपि लाभरोभले सो मागलाई अव्यावहारिक भन्दै अस्वीकार गरे र पूर्वी युरोपमा तैनाथ बेलायती र नेटो सेनातर्फ औँला उठाए।
लाभरोभले भने, “रुसी भूमिबाट रुसी सेना फिर्ता गर्नुपर्ने माग खेदजनक छ। हामी कसैलाई धम्की दिन चाहँदैनौं, तर हामी आफैं खतराको सामना गरिरहेका छौँ।” एजेन्सीको सहयोगमा
